नेपाली कांग्रेसले रामेछाप जिल्ला सभापति पूर्णबहादुर तामाङ (कान्छाराम)लाई निलम्बन गरेको छ ।

पार्टी नेतृत्वविरुद्ध भ्रमपूर्ण र तथ्यहीन अभिव्यक्ति दिएको भन्दै कांग्रेसको अनुशासन समितिले उनलाई निलम्बन गरेको हो ।

अनुशासन उल्लंघन कसुरमा निर्णय नहुँदासम्म उनलाई निलम्बन गरिएको कांग्रेसका कार्यवाहक मुख्य सचिव कृष्णप्रसाद दुलालद्वारा जारी विज्ञप्तिमा उल्लेख छ ।​ '...अनुशासन उल्लंघन गरेको कसुरमा निर्णय नहुन्जेलसम्मका लागि पूर्णबहादुर तामाङ (कान्छाराम)लाई आजैका मितिदेखि नेपाली कांग्रेस रामेछाप जिल्लाको सभापति पदमा रही कामकाज गर्न नपाउने गरी निलम्बन गर्ने निर्णय गर्दछ,' जारी विज्ञप्तिमा भनिएको छ ।

यसैगरी अनुशासन समितिले यसअघि पूर्वकार्यवाहक सभापति पूर्णबहादुर खड्कालाई पनि स्पष्टीकरण सोध्ने निर्णय गरेको थियो । तर सर्वोच्च अदालतको फैसलापश्चात् उक्त निर्णयको औचित्य समाप्त भएकोले त्यसलाई तामेलीमा राखिएको कांग्रेसले जनाएको छ ।

'नेपाली कांग्रेस केन्द्रीय अनुशासन समितिको मिति २०८३ वैशाख २ गतेको निर्णयअनुसार पूर्व कावा सभापति पूर्णबहादुर खड्कालाई पदीय जिम्मेवारीका सम्बन्धमा स्पष्टीकरण सोधिएकोमा सम्मानित सर्वोच्च अदालतको मिति २०८३/०१/०४ गतेको फैसलापश्चात् उक्त निर्णयको औचित्य समाप्त भएकोले हाल यस विषयको निर्णय प्रक्रियालाई तामेलीमा राख्ने निर्णय गर्दछ,' जारी विज्ञप्तिमा भनिएको छ ।