नेपाल प्रहरीले काठमाडौँको जडीबुटी क्षेत्रबाट पैदलयात्रुलाई दुःख दिने ३२ जनालाई पक्राउ गरेको छ ।

काठमाडौँ उपत्यका अपराध अनुसन्धान कार्यालयका अनुसार लामो समयदेखि जडीबुटी क्षेत्रमा सर्वसाधारणलाई जबर्जस्ती सवारीसाधनमा चढाउने, झोला तथा सामान तानेर दुःख दिएको भन्ने गुनासोका आधारमा निगरानीसहितको अभियान सञ्चालन गरिएको थियो । सोही क्रममा उनीहरूलाई पक्राउ गरिएको हो ।

कार्यालयका प्रवक्ता एवं प्रहरी उपरीक्षक रामेश्वर कार्कीका अनुसार पक्राउ परेकामध्ये अधिकांश दोलखा, रामेछाप, सिन्धुपाल्चोक, काभ्रेपलाञ्चोक, ओखलढुङ्गा र सुनसरीका छन् । उनीहरूको थप अनुसन्धान भइरहेको छ ।

प्रवक्ता कार्कीले सर्वसाधारणलाई कुनै व्यक्ति वा समूहले अनावश्यक दुःख दिएमा तत्काल नजिकको प्रहरी कार्यालय वा प्रहरीको सहायता नम्बरमा सम्पर्क गर्न आग्रह गरे ।