२४ जेठ २०८३, आइतबार
गएराति काठमाडौंको थानकोटमा चक्कु प्रहारबाट एक जनाको हत्या भएको छ ।
चन्द्रागिरि नगरपालिका–३ थानकोट खरिबोटमा २५ वर्षीय जाकिर मन्सुरीको हत्या भएको हो ।
उनलाई महोत्तरी घर भएका अन्दाजी ३८ वर्षीय समी अहमदले चक्कु प्रहार गरेका थिए । नाताले उनीहरू सालाभिना रहेको पाइएको छ। जाकिर पनि महोत्तरीकै हुन् ।
चक्कु प्रहारबाट घाइते जाकिरलाई उपचारका लागि सतुङ्गलस्थित मेडपोइन्ट अस्पतालमा लगिएको थियो । त्यसक्रममा राति साढे ९ बजेति चिकित्सकले उनलाई मृत घोषणा गरेका थिए ।
चक्कु प्रहार गर्ने समी अहमदलाई प्रहरी वृत्त थानकोटले नियन्त्रणमा लिएको जिल्ला प्रहरी परिसर काठमाडौंका प्रवक्ता, एसपी पवन भट्टराईले लोकान्तरलाई जानकारी दिए ।
जाकिरको शवलाई जाँच मुचुल्कापछि पोष्टमार्टमका लागि त्रिवि शिक्षण अस्पताल महाराजगञ्ज पठाइएको र घटनाको अनुसन्धान भइरहेको एसपी भट्टराईले बताए ।
प्रहरीको प्रारम्भिक अनुसन्धानमा अहमदले घरायसी विवादमा साला नाना पर्ने जाकिरलाई धारिलो हतियार (तरकारी काट्ने चक्कु) प्रहार गरेका थिए ।
