पछिल्लो समय विद्यालय व्यवस्थापन, नेतृत्व, लगानी र गुणस्तर वृद्धिका लागि भएका विभिन्न प्रयासका कारण सामुदायिक विद्यालयमा विद्यार्थीको आकर्षण बढ्दै गएको पाइएको छ । 

बुधबार सरकारले सार्वजनिक गरेको आर्थिक सर्वेक्षण अनुसार शैक्षिक सत्र २०८२ मा कूल विद्यालयको ७५.३ प्रतिशत सामुदायिक विद्यालय र २४.७ प्रतिशत संस्थागत विद्यालय रहेका छन् । 

त्यस्तै, ६२.२ प्रतिशत विद्यार्थी सामुदायिक विद्यालयमा र ३७.८ प्रतिशत विद्यार्थी संस्थागत विद्यालयमा अध्ययनरत छन् । तह बढ्दै जाँदा संस्थागत विद्यालयमा विद्यार्थी भर्ना प्रतिशत घट्दै गएको सर्वेक्षणले देखाएको छ । 

सामुदायिक विद्यालयमध्ये रूपन्देही जिल्लास्थित कालिका मानवज्ञान माध्यमिक विद्यालयमा सबैभन्दा बढी ८ हजार २ सय ३९ विद्यार्थी अध्ययनरत रहेका छन् ।

यस्तै, तिलोत्तमा नगरपालिकास्थित शान्ति नमूना माविमा ७ हजार १२० विद्यार्थी, धनुषाको विदेह नगरपालिकास्थित जनता नमूना माविमा ६ हजार २६६ विद्यार्थी अध्ययनरत छन् ।