अध्यागमन विभागले पर्यटक भिसाको उद्देश्यविपरीत व्यावसायिक गतिविधिमा संलग्न रहेको आरोपमा दुई चिनियाँ नागरिकलाई पक्राउ गरेको छ ।

विभागले बिहीबार जारी गरेको विज्ञप्तिअनुसार नियन्त्रणमा लिइएका दुवै जना पुरुष हुन् । उनीहरू पर्यटक भिसामा नेपालमा बसोबास गर्दै विभिन्न व्यावसायिक गतिविधिमा संलग्न रहेको प्रारम्भिक अनुसन्धानबाट खुलेको विभागले जनाएको छ ।

प्राप्त उजुरी र प्रारम्भिक अनुसन्धानका क्रममा उनीहरूले सामाजिक सञ्जाल टिकटकमार्फत प्रचारप्रसार गर्दै सम्पर्कमा आएका ग्राहकलाई विभिन्न खाद्य सामग्री बिक्री वितरण गर्ने गरेको पाइएको छ । 

उनीहरूले हिमाली क्षेत्रका स्याउ, ओखर, लसुन, किसमिसलगायत सामग्री सस्तो मूल्यमा उपलब्ध गराउने दाबी गरे पनि बजार मूल्यभन्दा महँगो दरमा बिक्री गर्ने गरेको विभागको भनाइ छ ।

अनुसन्धानका क्रममा ती नागरिकले दुई वर्षअघि विदेशी लगानी भित्र्याई ‘LIU JUN Hotel with Restaurant’ स्थापना गर्ने उद्देश्यले व्यावसायिक (बिजनेस) भिसा प्राप्त गरेको देखिएको छ । तर प्रतिबद्धताअनुसार लगानी भित्र्याएको नपाइएको र हाल पर्यटक भिसामा नेपालमा बसोबास गरिरहेको विभागले जनाएको छ ।

विभागका अनुसार उनीहरू सन् २०२४ मा चीनस्थित Tibet Huida International Trade तथा Xizang Shang Cheng Health Industries का बजार विश्लेषकका रूपमा नेपाल प्रवेश गरेका थिए ।

प्रारम्भिक अनुसन्धानबाट उनीहरूले नेपालमा गैरकानुनी रूपमा व्यावसायिक गतिविधि सञ्चालन गर्न नेपाली नागरिकको नाममा ‘Nepal Zangni Trading and Investment’ नामक कम्पनी दर्ता गराई चिनियाँ कृषि फार्मको नाममा व्यवसाय सञ्चालन गरेको देखिएको छ । उक्त कम्पनीको प्रचारप्रसारसमेत टिकटकमार्फत गर्ने गरेको पाइएको विभागले जनाएको छ ।

घटनाबारे थप अनुसन्धान भइरहेको विभागले जनाएको छ । विभागले नेपालको अध्यागमन कानूनअनुसार विदेशी नागरिकले भिसा प्राप्त गरेको उद्देश्यबाहेक अन्य गतिविधिमा संलग्न हुन नपाउने स्पष्ट पारेको छ । 

भिसाको शर्त र उद्देश्यविपरीत गतिविधि गरेको पाइएमा अनुसन्धानपछि जरिवाना, निष्कासन तथा निश्चित वा अनिश्चित अवधिसम्म नेपाल प्रवेशमा प्रतिबन्ध लगाउन सकिने व्यवस्था रहेको विभागले जनाएको छ ।