२४ जेठ २०८३, आइतबार
युक्रेनले रुसको दोस्रो ठूलो शहर सेन्ट पिटर्सबर्ग र आसपासका क्षेत्रमा ठूलो परिमाणमा ड्रोन आक्रमण गरेको छ।
आक्रमणका कारण सैन्य संरचनामा आगलागी भएको र केही क्षेत्रका बासिन्दालाई सुरक्षित स्थानमा सारिएको रुसी अधिकारीहरूले बताएका छन् ।
लेनिनग्राद क्षेत्रका गभर्नर अलेक्जेन्डर द्रोज्देन्कोका अनुसार सेन्ट पिटर्सबर्ग वरपर १४० भन्दा बढी युक्रेनी ड्रोन खसालिएका छन् ।
शहरका गभर्नर अलेक्जेन्डर बेग्लोभले सन् २०२२ मा रुसले युक्रेनमाथि पूर्ण आक्रमण थालेयता पहिलो पटक स्थानीय बासिन्दालाई घरभित्रै बस्न आग्रह गरेका छन् ।
द्रोज्देन्कोले आक्रमणका कारण एक सैन्य प्रतिष्ठानमा आगलागी भएको र केही भवनमा सामान्य क्षति पुगेको बताए । सुरक्षा कारण देखाउँदै प्रभावित क्षेत्रका बासिन्दालाई अन्यत्र सारिएको पनि उनले जानकारी दिए ।
युक्रेनी राष्ट्रपति भोलोदिमिर जेलेन्स्कीले आफ्ना सेनाले सेन्ट पिटर्सबर्ग नजिकैको क्रोन्स्टाडस्थित रुसी नौसैनिक अड्डा तथा हतियार भण्डारलाई निशाना बनाएको बताएका छन् । उनले रुसी आक्रमणको जवाफस्वरूप युक्रेनी ड्रोनले करिब एक हजार किलोमिटर दूरी पार गरी उक्त आक्रमण गरेको दाबी गरेका छन् ।
जेलेन्स्कीका अनुसार दक्षिणी क्रास्नोडार क्षेत्रमा रहेको एक तेल भण्डारण केन्द्र पनि युक्रेनको लामो दूरीको आक्रमणको निशानामा परेको छ ।
युक्रेनको मानवविहीन प्रणाली बलअन्तर्गत ४१३ औं ‘रेड’ रेजिमेन्टका कमान्डर येभेन करासले बीबीसीसँग कुरा गर्दै रुसी भूभागभित्रका लक्ष्यमा आक्रमण गर्न अपेक्षाकृत सजिलो भएको दाबी गरेका छन् । उनका अनुसार युक्रेनी ड्रोनहरूलाई लक्ष्यसम्म पुग्न खासै अवरोध सामना गर्नुपरेको छैन ।
उता रुसी रक्षा मन्त्रालयले शनिबार बिहानदेखि देशका विभिन्न क्षेत्रमा ३३९ वटा युक्रेनी ड्रोन खसालिएको वा अवरोध गरिएको जनाएको छ ।
यसैबीच युक्रेनले रुसले कालोसागरमा मानवीय उद्धार अभियानमा खटिएका दुई नागरिक जहाजमाथि आक्रमण गरेको आरोप लगाएको छ । युक्रेनका क्षेत्रीय विकासमन्त्री ओलेक्सी कुलेबाका अनुसार उक्त घटनामा केही व्यक्ति घाइते भएका छन् । यद्यपि रुसी सेनाले यसबारे कुनै प्रतिक्रिया जनाएको छैन ।
सेन्ट पिटर्सबर्गमा भएको पछिल्लो ड्रोन आक्रमण रुसको प्रमुख आर्थिक मञ्च (इकोनोमिक फोरम) सम्पन्न भइरहेका बेला भएको हो । विदेशी लगानी आकर्षित गर्ने उद्देश्यले आयोजित उक्त कार्यक्रममा १३० देशका हजारौं प्रतिनिधि सहभागी भएका थिए ।
पछिल्लो घटनाक्रम रुस–युक्रेन युद्ध अन्त्यका लागि भइरहेको कूटनीतिक प्रयासबीच भएको हो । युक्रेनी राष्ट्रपति जेलेन्स्कीले केही दिनअघि रुसी राष्ट्रपति भ्लादिमिर पुटिनलाई युद्धविराम र प्रत्यक्ष वार्ताका लागि आह्वान गरेका थिए । तर पुटिनले युक्रेनले आफ्नो सैन्य क्षमता पुनर्गठन गर्न सक्ने भन्दै युद्धविरामप्रति असहमति जनाएका थिए ।
रुसले डोनेत्स्क, लुहान्स्क, खेर्सोन र जापोरिज्झिया क्षेत्रमाथिको आफ्नो नियन्त्रणलाई मान्यता दिन तथा युक्रेनले नेटो सदस्यता प्रयास त्याग्नुपर्ने अडान दोहोर्याउँदै आएको छ । युक्रेनले भने आफ्नो कुनै भूभाग नछाड्ने स्पष्ट गर्दै आएको छ ।
युद्ध जारी रहेसँगै युक्रेनले पछिल्ला वर्षहरूमा ड्रोन क्षमतामा उल्लेखनीय वृद्धि गरेको छ । युक्रेनी सेनाले विशेषगरी रुसी ऊर्जा पूर्वाधार, तेल भण्डारण केन्द्र र सैन्य आपूर्ति प्रणालीलाई निशाना बनाउँदै आएको छ ।
रुस र युक्रेनले एकअर्कामाथि नागरिक क्षेत्रलाई लक्षित गरी आक्रमण गरेको आरोप लगाउँदै आएका छन् ।
