श्रम संस्कृति पार्टीका अध्यक्ष एवं प्रतिनिधिसभाका सदस्य हर्कराज राई (हर्क साम्पाङ)लाई ट्राफिक नियम उल्लंघन गरेको कसुरमा कारबाहीको तयारी गरिएको छ ।

एक हातले सवारी साधनको ह्यान्डल र अर्को हातले मोबाइल फोन समातेर 'भिडियो लाइभ' गर्दै लापरबाहीपूर्ण तरिकाले मोटरसाइकल चलाएको भन्दै ट्राफिक प्रहरीले उनीमाथि कारबाही प्रक्रिया अगाडि बढाएको हो ।

नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय इटहरी, सुनसरीका प्रहरी उपरीक्षक (एसपी) दीपक गिरीका अनुसार साम्पाङलाई २४ घण्टे पुर्जी थमाउने तयारी भइरहेको छ । 'उहाँलाई पुर्जी थमाउँछौँ, त्यसपछि उहाँले जरिवाना तिर्नुपर्ने हुन्छ,' एसपी गिरीले भने, 'उहाँले कुदाउनुभएको मोटरसाइकलको ब्लूबुक हेरेपछि कसुरको संख्या थाहा हुन्छ । पहिलो पटकको गल्ती रहेछ भने ५ सय रुपैयाँ जरिवाना हुन्छ ।'

केही दिनअघि सामाजिक सञ्जालमा प्रत्यक्ष प्रसारण (लाइभ) गर्दै मोटरसाइकल चलाउने क्रममा सन्तुलन गुमाउँदा दुर्घटनामा परेर साम्पाङ सामान्य घाइते भएका थिए । उक्त दुर्घटना कटारीबाट धरानतर्फ आउने क्रममा भएको प्रहरीले जनाएको छ ।

घाइते भएपछि पनि उनले कोशी नदी क्षेत्रमा पुगेर पुनः भिडियो बनाएर सार्वजनिक गरेका थिए ।

सवारी चालक आफैंले लापरबाहीपूर्ण ढङ्गले भिडियो वा फोटो खिच्दै सवारी साधन कुदाउनु सवारी तथा यातायात व्यवस्था ऐन विपरीत भएको प्रहरीको ठहर छ ।

दुर्घटनामा ठूलो मानवीय वा भौतिक क्षति नभए पनि यस्तो लापरबाहीलाई निरुत्साहित गर्न कानूनअनुसार जरिवाना गरिने ट्राफिक कार्यालयले जनाएको छ । ट्राफिक भायोलेसन सिस्टम (टीभीएस)मा चालकको अनुमतिपत्र (लाइसेन्स) वा सवारी दर्ता किताब (ब्लूबुक) को नम्बर प्रविष्टि गरेपछि कसुरको संख्याका आधारमा जरिवाना रकम तय हुनेछ ।

नियमअनुसार पहिलो पटकको गल्ती भए ५०० रुपैयाँ, दोस्रो पटक भए १,००० रुपैयाँ र तेस्रो पटक वा सोभन्दा बढी भए १,५०० रुपैयाँ जरिवाना बेहोर्नुपर्नेछ । जरिवानाको पुर्जी जारी भएपछि सम्बन्धित व्यक्तिले नेपाल सरकारको राजस्व खातामा बैंक वा डिजिटल वालेटमार्फत रकम जम्मा गरेपछि मात्र नियन्त्रणमा लिइएका कागजात फिर्ता पाउनेछन् ।

साम्पाङ प्रत्यक्ष सम्पर्कमा नआएको खण्डमा 'नागरिक एप' मार्फत समेत कारबाही गर्ने तयारी ट्राफिक प्रहरीको छ ।

संविधान र कानूनको नजरमा सबै नागरिक समान हुने भएकाले सार्वजनिक पदमा रहेका व्यक्तिहरूले पनि नियमको पूर्ण पालना गर्नुपर्ने सन्देश दिन यो कारबाही प्रक्रिया अघि बढाइएको प्रहरीले जनाएको छ ।

साम्पाङ आफैंले सार्वजनिक गरेको भिडियोले नियम उल्लंघनको पुष्टि गरिसकेकाले कारबाहीबाट उम्किने ठाउँ नरहेको ट्राफिक अधिकारीहरूको भनाइ छ ।