विश्वकप २०२६ को समूह 'ए' को दोस्रो खेलमा एसियाली शक्ति दक्षिण कोरिया र युरोपेली टोली चेक रिपब्लिक आमने-सामने हुँदैछन्। 

नेपाली समयअनुसार शुक्रबार बिहान ७:४५ बजे सुरु हुने यो खेललाई यस समूहको सबैभन्दा प्रतिक्षित खेलहरूमध्ये एक मानिएको छ।

दुवै टोलीले आफ्ना अन्तिम तयारी खेलहरूमा जित दर्ता गर्दै उच्च मनोबलका साथ विश्वकपको यात्रा सुरु गर्दैछन्। दक्षिण कोरियाले एल साल्भाडोरलाई पराजित गरेको थियो भने चेक गणतन्त्रले ग्वाटेमालामाथि जित निकालेको थियो।

प्रशिक्षक हङ म्याङ-बोको नेतृत्वमा रहेको दक्षिण कोरियाली टोलीको मुख्य आधार कप्तान सन ह्युङ-मिन हुन्। प्रिमियर लिग स्टार सनसँगै टोलीमा ली काङ-इन, ह्वाङ इन-बेओम र ली जे-सुङ जस्ता अनुभवी खेलाडीहरूको साथ छ। टोलीले सन्तुलित रक्षापंक्ति र तीव्र गतिको आक्रमणको रणनीति अपनाउने अपेक्षा गरिएको छ।

सन् २००६ पछि पहिलो पटक विश्वकपमा फर्किएको चेक रिपब्लिक यस पटक 'सरप्राइज प्याकेज' बन्ने लक्ष्यमा छ। प्रशिक्षक मिरोस्लाभ कोउबेकको टोली प्याट्रिक शिकको गोल गर्ने क्षमतामा धेरै निर्भर रहनेछ। साथै टोलीमा टोमस सौचेक र भ्लादिमिर कुफल जस्ता अनुभवी खेलाडीहरूले मिडफिल्ड र डिफेन्स सम्हाल्नेछन्।

समूह 'ए' मा आफ्नो स्थान बलियो बनाउन दुवै टोलीलाई यो जित निकै महत्त्वपूर्ण छ। मेक्सिकोको गर्मी र एक्रोन स्टेडियमको माहोलमा कुन टोलीले बाजी मार्ला भन्ने कुराले फुटबल प्रेमीहरूको ध्यान खिचेको छ।