काठमाडौंको बालकुमारी क्षेत्रबाट प्रहरीले ३ सय ग्राम खैरो हेरोइनसहित तीन जनालाई पक्राउ गरेको छ ।

लागूऔषध नियन्त्रण ब्युरोको टोलीले नियन्त्रणमा लिन खोज्दा भाग्ने प्रयास गर्ने क्रममा प्रहरीले चलाएको गोली लागेर एक जना घाइते भएका छन् ।

लागूऔषध नियन्त्रण ब्युरोका अनुसार काठमाडौं उपत्यकामा लागूऔषध आपूर्ति गर्ने गिरोहको निगरानीका क्रममा शनिबार काठमाडौं महानगरपालिका–३२ बालकुमारी पुलनजिक भारतबाट ल्याइएको खैरो हेरोइन बिक्री भइरहेको सूचनाका आधारमा प्रहरी टोली पुगेको थियो ।

प्रहरीले कारोबारीलाई नियन्त्रणमा लिन खोज्दा उनीहरूले प्रहरीमाथि आक्रमण गर्दै भाग्न खोजेका थिए । चेतावनीस्वरूप २ राउन्ड फायर गरी रोक्न खोज्दा पनि नरोकेपछि प्रहरीले थप चलाएको गोली लागेर पर्साको पर्सा पटेर्वा सुगौली गाउँपालिका–४ घर भएका ३९ वर्षीय किशोर प्रसाद ओझैया घाइते भएका हुन् । उनको दाहिने खुट्टाको घुँडामुनि गोली लागेको र राष्ट्रिय ट्रमा सेन्टरमा उपचार भइरहेको ब्युरोले जनाएको छ ।

पक्राउ पर्ने अन्यमा कैलालीको टीकापुर नगरपालिका–५ का २५ वर्षीय अशोक भुल र सप्तरीको राजगढ गाउँपालिका–३ का २० वर्षीय निरज कुमार मण्डल रहेका छन् । 

उनीहरूको साथबाट ३ सय ग्राम खैरो हेरोइन र चार थान मोबाइल फोन बरामद गरिएको प्रहरीले जनाएको छ ।

ब्युरोका एसपी दुर्गाराज रेग्मीका अनुसार घाइते ओझैया यसअघि लागूऔषध मुद्दामा तीन वर्ष कैद र एक लाख चार हजार रूपैयाँ जरिवाना भुक्तान गरी २०८२ पुस १७ गते नख्खु कारागारबाट छुटेका व्यक्ति हुन् ।