१९ असार २०८३, शुक्रबार
'तिमीहरू क्यानडाका नायक हौ । तिम्रो कारणले गर्दा यो देशमा यो खेलको भविष्य अब विशाल भएको छ,' लस एन्जलस स्टेडियमको मैदानमा खेल सकिएलगत्तै आफ्ना खेलाडीहरूलाई घेरेर क्यानडाका मुख्य प्रशिक्षक जेसी मार्शले भने ।हुन पनि क्यानडाको फुटबल इतिहासमा एउटा नयाँ युगको सुरुवात भएको संकेत देखिएको छ ।
गएराति दक्षिण अफ्रिकालाई १–० ले पराजित गर्दै क्यानडा विश्वकपको अन्तिम १६ मा पुग्नु केवल एउटा जित मात्र होइन, यो एउटा 'आइस हक्की' प्रेमी राष्ट्र 'फुटबल राष्ट्र' मा रूपान्तरण भएको क्षण पनि हो ।
विश्वकपको सह-आयोजक भएर पनि अमेरिका र मेक्सिकोको तुलनामा ओझेलमा परेको क्यानडाले मैदानभित्र आफ्नो प्रदर्शनबाट सबैको ध्यान आफूतिर खिच्न सफल भएको छ ।
प्रशिक्षक मार्शले दुई वर्षअघि टोली सम्हाल्दा क्यानडालाई फुटबलको नयाँ शक्ति बनाउने जुन लक्ष्य राखेका थिए, त्यो अहिले साकार हुँदै गइरहेको देखिन्छ ।
कुनै समय क्यानडाका घरेलु खेलहरूमा विपक्षी समर्थकको बाहुल्यता हुने गर्थ्यो, तर अहिले क्यानडाका समर्थकहरू हजारौँको संख्यामा सीमा पार गरेर अमेरिका पुगेका छन् । स्टार खेलाडी अल्फोन्सो डेभिसले टोरन्टोमा भएको पहिलो खेलमा समर्थकहरूको रातो र सेतो सागर देखेर आफ्नो आँखामा आँसु आएको स्मरण गर्दै क्यानडामा फुटबलप्रतिको क्रेज अकल्पनीय रूपमा बढेको बताए ।
इतिहास पल्टाउँदा यो उपलब्धि अझै ठूलो देखिन्छ । यसअघिका विश्वकपमा खेलेका ६ वटै खेल हारेको क्यानडाले यसपटक भने बोस्नियासँग बराबरी खेल्दै पहिलो अंक जोड्यो भने कतारलाई ६–० ले हराउँदै पहिलो जितको स्वाद चाख्यो । दक्षिण अफ्रिका विरुद्धको कठिन नकआउट खेलमा अन्तिम समयसम्म धैर्य कायम राख्दै स्टेफन युस्टाकियोले गरेको गोलले क्यानडालाई पहिलो पटक विश्वकपको अन्तिम १६ मा पुर्याएर इतिहास रच्न मद्दत गर्यो ।
सह-आयोजक भए पनि समूह चरणको नतिजाका कारण क्यानडाले आफ्नो नकआउट खेल अमेरिकाको लस एन्जलसमा खेल्नुपर्यो । इतिहासमा पहिलो पटक कुनै आयोजक राष्ट्रले आफ्नै देशबाहिर विश्वकपको खेल खेल्नुपरे पनि समर्थकहरूको साथले गर्दा यो क्यानडाकै घरेलु मैदान जस्तो देखिएको थियो । प्रशिक्षक मार्शले खेलपछि भने, 'हाम्रा प्रशंसकहरूको अगाडि भ्यानकुभरमा यो जित हासिल गर्न नपाउनु दुःखद भए पनि खेलाडीहरूले देखाएको चरित्र र एकताले म गौरवान्वित छु ।'
अब क्यानडाले ह्युस्टनमा हुने प्रिक्वार्टरफाइनलमा मोरक्को वा नेदरल्याण्ड्स विचको विजेतासँग सामना गर्नेछ । मार्शले यसलाई एउटा बिना दबाबको अवसरको रूपमा व्याख्या गरेका छन् । आधुनिक फुटबलको शक्ति मोरक्को वा परम्परागत शक्ति नेदरल्याण्ड्स जोसँग खेले पनि क्यानडाले अब डरबिना आफ्नो स्वभाविक आक्रामक खेल पस्कने उनको भनाइ छ ।
