०१ असार २०८३, सोमबार
काठमाडौं, ३० फागुन- श्रम कार्यालयमा पुग्ने सेवाग्राहीमाथि हुने ठगीसम्बन्धमा लोकान्तरमासमाचारप्रकाशित भएपछि प्रहरीले छापा मारी पक्राउ गरेका ३५ जनालाई सार्वजनिक अपराध ऐनअन्तर्गत कारबाही हुने भएको छ ।
काठमाडौं महानगर प्रहरी परिसरका प्रहरी नायव उपरीक्षक मोहनकुमार थापाले लोकान्तरलाई बताएअनुसार हाल उनीहरूलाई थप अनुसन्धानका लागि ७ दिनको म्याद लिएर हिरासतमा राखिएको र त्यसलगत्तै सरकारी वकिलको कार्यालयमार्फत अदालतमा पेस गरिने भएको छ ।
गत फागुन २१ गते लोकान्तरले श्रम कार्यालय परिसरमै गएरविदेश जानेहरूबाट जनही ५०० देखि २५०० रुपैयाँसम्म असुली गर्ने गरेको समाचारसार्वजनिक गरेको थियो । त्यसलगत्तै सादा पोशाकका प्रहरीहरू सेवाग्राही बनेर उनीहरुलाई रंगेहात समातेका थिए । उनीहरुलाई अहिले महानगरीय प्रहरी परिसरमा थप अनुसन्धानका लागि हिरासतमा राखिएको छ ।
प्रनाउ मोहन कुमार थापाले बताए अनुसार सार्वजनिक मुद्दा सीडीओ कार्यालयले हेर्ने हुँदा पक्राउ परेका सबैको मुद्दा सिडिओ कार्यालयमा दर्ता गरिने छ । अनुसन्धानका क्रममा पक्राउ परेकाहरू दोषि देखिए उनीहरुलाई एक वर्षसम्म कैद र जनही २८००० सम्म जरिवाना हुनेछ ।
अनुसन्धान सकिएपछि सरकारी वकिलको कार्यालयमा मिसिल पेस गर्ने र त्यहाँ चार्जसिट तयार गरेपछि सिडिओ कार्यालयले बयान लिने अनि बयानका आधारमा अदालतले मुद्दाको फैसला गर्नेछ ।
सार्वजनिक ऐनअन्तर्गत लगाइएका मुद्दामा आरोपीहरूलाई प्रायः धरौटी मागेर सामान्य तारेखमा रिहा गर्ने गरिएको प्रनाउ मोहनकुमार थापाले बताए ।
अदालतले अन्तिम फैसला नसुनाउने बेलासम्म उनीहरूलाई नियमित तारेखमा बोलाइनेछ । यस्ता ठगी नियन्त्रण गर्न महानगरीय प्रहरी परिसरले निरन्तर अनुगमन र अनुसन्धान गरिरहने उनले बताए ।
पढ्नुहोस् यो पनि :
श्रम गर्न जानेबाट जनही २५ सयसम्म ठगी, सोल्टीमोडबाटै पछि लाग्छन् दलाल
