फुटबल इतिहासकै महान् खेलाडीमध्येका एक लियोनेल मेसी आफ्नो जीवनको छैटौँ विश्वकप फुटबल प्रतियोगिता मैदान उत्रिएका छन् । यदि उनका चिरपरिचित प्रतिद्वन्द्वी क्रिस्टियानो रोनाल्डो र मेक्सिकोका गुइलेर्मो ओचोआले पनि मैदानमा स्थान बनाए भने मेसीले उनीहरूसँगै संयुक्त रूपमा सबैभन्दा धेरै विश्वकप खेल्ने खेलाडीको कीर्तिमान साझेदारी गर्नेछन् ।

कतारमा सम्पन्न ऐतिहासिक फाइनल खेलमा फ्रान्सलाई हराउँदै अर्जेन्टिनालाई तेस्रो पटक विश्वविजेता बनाएका मेसीले सोही खेलमार्फत जर्मनीका पूर्व मिडफिल्डर लोथर माथाउसलाई पछि पार्दै विश्वकपमा सबैभन्दा बढी खेल खेल्ने खेलाडीको कीर्तिमान आफ्नो नाममा गरिसकेका छन्। 

इन्टर मियामीका यी ३८ वर्षीय जादुगरसँग विश्वकपमा सबैभन्दा बढी 'गोल्डेन बल' जित्ने कीर्तिमान पनि छ। उनले सन् २०१४ र २०२२ को विश्वकपमा यो प्रतिष्ठित पुरस्कार जितेका थिए।

विश्वकप इतिहासमा अहिलेसम्म सबैभन्दा बढी गोल गर्ने कीर्तिमान भने मेसीको नाममा छैन । तर, उत्तर अमेरिकामा जारी यस विश्वकपमा उनले यो कीर्तिमान पनि आफ्नो नाममा लेखाउन सक्ने प्रवल सम्भावना छ । विश्वकप इतिहासमा जर्मनीका स्ट्राइकर मिरोस्लाभ क्लोजले चारवटा विश्वकप खेल्दै कुल १६ गोल गरेर शीर्ष स्थान ओगटेका छन् ।

हाल फ्रान्सका किलियन एम्बाप्पेले सेनेगल विरुद्धको ३–१ को जितमा दुई गोल गर्दै विश्वकप इतिहासकै सर्वाधिक गोलकर्ताको सूचीमा संयुक्त रूपमा तेस्रो स्थानमा उक्लिएका छन् । मेसी एम्बाप्पेभन्दा ठीक एक गोल पछाडि अर्थात् १३ गोलमा छन् । यदि मेसीले प्रतियोगितामा थप ४ गोल गर्न सकेमा उनी क्लोजलाई उछिन्दै विश्वकप इतिहासकै सर्वाधिक गोलकर्ता बन्नेछन् । समूह चरणको शुरूआती खेलमै राम्रो शुरूआत गर्न सके मेसीको कीर्तिमानी सङ्ग्रहमा अर्को एउटा ऐतिहासिक स्वर्ण अक्षर थपिनेछ।

अर्जेन्टिनाले यसपटक आफ्नो विश्वकप यात्राको शुरूआत क्यान्सास सिटी स्टेडियममा अल्जेरिया विरुद्धको खेलबाट गर्दैछ, जहाँ सम्पूर्ण विश्वको नजर पुनः मेसीमै केन्द्रित हुनेछ। यो खेल मेसीका लागि निकै विशेष र ऐतिहासिक हुनेछ, किनभने यसै खेलमार्फत उनले अर्जेन्टिनाका लागि आफ्नो २०० औँ उपस्थिति पूरा गरेका छन् ।

रोचक कुरा त के छ भने, मेसीले विश्वकपमा डेब्यु गरेको ठीक २० वर्ष पुगेकै दिन यो दुर्लभ संयोग जुटेको हो । सन् २००६ को विश्वकपमा सर्बिया एन्ड मोन्टेनेग्रो विरुद्ध ६–० को जित निकाल्दा १६ वर्षीय मेसीले विश्वकपमा डेब्यु गर्दै आफ्नो पहिलो अन्तर्राष्ट्रिय गोल समेत गरेका थिए।

उमेर ढल्किँदै जाँदा अधिकांश खेलाडीको प्रदर्शन खस्कन्छ, तर सम्भ्रान्त खेलाडीहरूले आफूलाई अनुकूल बनाउँछन् । जस्तै, क्रिस्टियानो रोनाल्डोले आफ्नो गति कम हुँदै गएपछि आफूलाई पेनाल्टी बक्स भित्रको 'शिकारी स्ट्राइकर' का रूपमा ढाले। तर मेसीले आफ्नो गिरावटसँग सम्झौता गरेनन्, बरु आफूलाई सधैँ खेलको केन्द्रमा राखिराख्न र खेललाई आफ्नो नियन्त्रणमा राख्नका लागि निरन्तर परिमार्जित गरिरहे।

यदि अर्जेन्टिना सन् १९६२ पछि विश्वकपको उपाधि सफलतापूर्वक रक्षा गर्ने इतिहासकै तेस्रो राष्ट्र बन्न चाहन्छ भने लियोनेल मेसी नै त्यसको केन्द्रबिन्दुमा हुने कुरामा कुनै शङ्का छैन। मुख्य प्रशिक्षक लियोनेल स्कालोनीको नेतृत्वमा रहेको अर्जेन्टिनाले कतारमा तेस्रो विश्वकप उपाधि जित्नुका साथै दुई पटक कोपा अमेरिकाको उपाधि समेत जितिसकेको छ।

यद्यपि, यस प्रतियोगिताको अवधिभरमा ३९ वर्ष पुग्ने मेसीको खेलमा उमेरका कारण केही सुस्तता आउनु स्वाभाविक हो। अर्का अनुभवी खेलाडी एन्जेल डि मारियाले पनि अन्तर्राष्ट्रिय फुटबलबाट सन्न्यास लिइसकेका छन्। यस्तो अवस्थामा मेसी पूर्ण लयमा नहुँदा पनि अर्जेन्टिनाले पुरानै साख जोगाइराख्न सक्छ कि सक्दैन भन्ने बहस शुरू भएको छ। अब अर्जेन्टिनाका युवा र सहयोगी खेलाडीहरूले मोर्चा सम्हाल्ने बेला आएको छ।

अर्जेन्टिनासँग जुलियन अल्भारेज र लाउटारो मार्टिनेज जस्ता स्थापित गोलकर्ताहरू छन् भने मिडफिल्डबाट खेल सञ्चालन गर्न एन्जो फर्नान्डेज जस्ता रचनात्मक खेलाडी उपलब्ध छन्। बेन्चबाट खेललाई गति दिन निको पाज र भ्यालेन्टिन बार्को जस्ता युवा प्रतिभाहरू पनि टोलीमा छन्।