१५ असार २०८३, सोमबार
भिजिट भिसामा खाडी मुलुक ओमान जान लागेका २७ जना महिलालाई प्रहरीले नियन्त्रणमा लिएर अनुसन्धान थालेको छ ।
बुधबार राति प्रहरीले त्रिभुवन अन्तर्राष्ट्रिय विमानस्थलबाट उनीहरूलाई नियन्त्रणमा लिएको हो ।
काठमाडौं उपत्यका अपराध अनुसन्धान कार्यालयका अनुसार फ्लाई दुबईको फरक फरक उडानद्वारा यी महिला ओमान जाने तयारीमा थिए ।
अनुसन्धान कार्यालयका प्रमुख, एसएसपी सन्तोष खड्काका अनुसार उनीहरूसँग ओमानको भिसा, टिकट र होटल डकुमेन्ट देखिए पनि सोही पासपोर्टमा कुवेतको भिसा पनि भेटिएपछि शंकाका आधारमा उनीहरूमाथि निगरानी बढाइएको थियो ।
अध्यागमन कार्यालयले शंका गरेपछि प्रहरीले अनुसन्धान गरेको हो । प्रहरीका अनुसार नियन्त्रणमा लिइएका महिलाहरू फ्लाई दुबईको उडानबाट ओमानको राजधानी मस्कट हुँदै त्यहाँबाट कुवेत जाने रुट तय भएको थियो ।
‘भिसा शंकास्पद देखिएपछि नियन्त्रणमा लिइएको हो, यी महिलाहरूलाई विदेश पठाउने गिरोहबारे अनुसन्धान भइरहेको छ’, एसएसपी खड्काले भने ।
