१५ असार २०८३, सोमबार
नेकपा (एमाले)को केन्द्रीय सचिवालय बैठक बसेको छ ।
बैठक अध्यक्ष केपी शर्मा ओलीको भक्तपुरको गुन्डुस्थित निवासमा मंगलबार साँझ जारी छ ।
एमाले उपाध्यक्ष तथा पूर्वअर्थमन्त्री विष्णु पौडेल पक्राउ परेको भोलिपल्ट सचिवालय बैठक बसेको हो । पौडेललाई सम्पत्ति शुद्धीकरण सम्बन्धी मुद्दामा सोमबार सुर्खेतबाट पक्राउ गरिएको थियो ।
मंगलबार दिउँसो उनलाई सम्पत्ति शुद्धीकरण अनुसन्धान विभागमा उपस्थित गराइएको थियो । विभागले म्याद थपका लागि पौडेललाई मंगलबार नै विशेष अदालतमा पेस गरेको थियो ।
विभागले २० दिनको म्याद थप माग गरे पनि अदालतले ७ दिनको म्याद दिएको छ ।
मंगलबार नै बसेको एमाले संसदीय दलको बैठकले पौडेललाई तत्काल रिहा गर्न माग गरेको थियो । पौडेललाई अपमानजनक ढंगले पक्राउ गरिएको एमालेको ठहर छ ।
‘विष्णु पौडेललाई अपमानपूर्ण ढंगले पक्राउ गरियो । उहाँसँग पीएसओ छ, राज्यको निगरानीमै हुनुहुन्थ्यो, आज काठमाडौं आउँदै हुनुहुन्थ्यो। त्यो थाहा हुँदाहुँदै राज्यले दुःख दिने हिसाबले पक्राउ गरियो,’ संसदीय दलको बैठकपछि प्रमुख सचेतक ऐन महरले भनेका थिए ।
पौडेलको पक्राउ प्रतिशोधपूर्ण, गैरन्यायिक तथा कानूनी राज्य र विधिको शासनविपरीत रहेको दाबी गर्दै एमाले संसदीय दलले यसको विरोध गरेको छ ।
