चितवनमा जारी राष्ट्रिय स्वतन्त्र पार्टी (रास्वपा)को महाधिवेशनमा झन्डै एक तिहाइ प्रतिनिधि मतदानमा अनुपस्थित भएका छन् ।

कूल ४३११ प्रतिनिधिमध्ये २९५९ जनाले मात्र मतदानमा भाग लिएका छन् । बाँकी  १३५२ जना मतदानमा अनुपस्थित रहे ।

रास्वपाले ९९ केन्द्रीय सदस्यका लागि गरेको निर्वाचनमा ८० वटा विद्युतीय भोटिङ मेसिन प्रयोग गरेको थियो ।

महाधिवेशनको समय लम्बिएपछि कतिपय प्रतिनिधि घर फर्किसकेका थिए । जसले गर्दा मतदानमा सहभागीको संख्या कम भएको नेताहरूले बताएका छन् । 

रास्वपाको ९९ केन्द्रीय सदस्यका लागि ३८४ जनाले उम्मेदवारी दिएका थिए ।

अब केन्द्रीय सदस्यको मतगणना सकेर दोस्रो चरणमा पदाधिकारीका लागि निर्वाचन हुनेछ । 

रास्वपाको पदाधिकारीमा उठ्न केन्द्रीय सदस्य अनिवार्य (निर्वाचित/मनोनीत) हुनुपर्नेछ ।

रास्वपा सभापतिमा रवि लामिछाने निर्विरोध निर्वाचित भइसकेका छन् भने अब खुला उपसभापति (दुई), महिला उपसभापति, महामन्त्री, दुई खुला सहमहामन्त्री र दुई महिला सहमहामन्त्रीका मतदान हुने नेता मनिष झाले जानकारी दिए ।

असार ९ गते सक्ने लक्ष्यका साथ ७ गते उद्‌घाटन भएको महाधिवेशन पाँचौं दिनसम्म पनि जारी छ ।