कैदीबन्दीसँग रकम असुली गरेको आरोपमा नेपाली कांग्रेसका नेता एवं कारागारका पूर्वचौकीदार अभिषेक गिरी पक्राउ परेपछि मोरङ कारागारका कैदीबन्दीहरू आन्दोलित बनेका छन् । जिल्ला प्रहरी कार्यालय मोरङबाट खटिएको टोलीले गिरीलाई शनिबार बिहान विराटनगर– ८, मधुमारास्थित उनकै निवासबाट नियन्त्रणमा लिएको थियो ।

गिरीसँग मिलेमतोको आशङ्कामा प्रहरीले कारागारका वर्तमान नाइके राकेश यादवलाई बयानका लागि जिल्ला प्रहरी कार्यालय ल्याएपछि कैदीबन्दीले नाराबाजी गरेका हुन् । नाइके यादवलाई कारागारबाट अन्यत्र सार्न खोजिएको भन्दै उनीहरूले विरोध जनाएका हुन् ।

गिरीलाई कारबाही गर्नुपर्ने तर यादवलाई सरुवा गर्न नपाइने उनीहरूको माग छ ।

तनाव बढेपछि प्रहरीले यादवलाई पुनः कारागारमै लगेर बयान लिन थालेको छ ।

प्रहरी निरीक्षक अभिषेक श्रेष्ठको नेतृत्वमा खटिएको टोलीले गिरीको निवासमा खानतलासी समेत गरेको थियो ।

सो क्रममा घरबाट केही तमसुकहरू बरामद भएको सुरक्षा स्रोतले जनाएको छ । सुरक्षा निकायका एक उच्च अधिकारीका अनुसार गिरीले कारागारमा नाइके हुँदा जेल पर्नुअगाडिकै मितिमा विभिन्न बहानामा कैदीबन्दीहरूलाई तमसुक गराएर पैसा असुल्ने गरेको प्रारम्भिक अनुसन्धानबाट खुलेको छ ।

गिरीमाथि कारागारका कैदीबन्दीलाई सरकारले उपलब्ध गराउने जाडो र गर्मीको लुगा भत्ता तथा उनीहरूले कारागारभित्र मुडा र गलैँचा बुनेर कमाएको रकम समेत जबरजस्ती लिने गरेको आरोप छ ।

हाल मोरङ कारागारमा १ हजार ९२ पुरुष र १०७ महिला गरी कुल १ हजार १९९ कैदीबन्दी रहेका छन् ।

उनीहरूले दैनिक ८० रुपैयाँ भत्ता पाउँछन्, जसको कुल रकम दैनिक करिब ९६ हजार रुपैयाँ हुन आउँछ ।

यसबाहेक सरकारले वार्षिक रूपमा जाडो र गर्मीका लागि छुट्टाछुट्टै २५ सयका दरले प्रतिकैदी ५ हजार रुपैयाँ उपलब्ध गराउँछ ।

कारागारभित्र करिब ५ सय जनाले मुडा र १०० जनाले गलैँचा बुन्ने काम गर्छन् । ती सामग्री बिक्रीबाट आएको रकम र सरकारी भत्तासमेत गिरीले कारागारका चौकीदार राकेश यादवसँगको मिलेमतोमा आफ्ना सहयोगीको खातामा पठाउन लगाएर असुल्ने गरेको प्रहरी स्रोतको दाबी छ ।

पक्राउ परेका गिरीलाई जिल्ला प्रहरी कार्यालय मोरङमा राखिएको छ । प्रहरी स्रोतका अनुसार गिरीले मुटु दुखेको भन्दै अस्पताल लैजान प्रहरीलाई दबाब दिइरहेका छन् ।

मोरङका प्रहरी नायब उपरीक्षक (डीएसपी) महेन्द्रकुमार मिश्रले कैदीबन्दीलाई अनुचित प्रभावमा पारेर रकम असुली गर्ने गरेको सूचनाका आधारमा गिरीलाई नियन्त्रणमा लिइएको बताए ।

घटनाबारे थप अनुसन्धान भइरहेको प्रहरीले जनाएको छ ।

पढ्नुहोस्, यो पनि

कारागारका कैदीबन्दीको रकम असुली गरेको आरोपमा कांग्रेसका स्थानीय नेता पक्राउ