पश्चिम नवलपरासीमा शुक्रवार तीन जनामा कोरोनाभाइरस (कोभिड १९) पुष्टि भयो । तीमध्ये एक जनालाई रूपन्देहीको भैरहवास्थित भीम अस्पतालमा पठाइएपनि आइसोलेसन अभावमा अन्य २ जना जिल्लाकै क्वारेन्टाइनमा बस्न बाध्य छन् । 

उनीहरू सदरमुकाम परासीस्थित आदर्श माविको क्वारेन्टाइनमै छन् । संक्रमितले पाउनुपर्ने उपचार सेवाबाट वञ्चित भएपछि उनीहरू मानसिकरूपमा त्रसित हुन थालेका छन् । प्रदेश सरकारले तराईका जिल्लामा २ सय पहाडमा ५० बेडको आइसोलेसन सेन्टर बनाउने नीतिगत निर्णय गरेको छ । 

रामग्राम नगरपालिकाका प्रमुख नरेन्द्रकुमार गुप्ताले आइसोलेसन बनाउने काम जिल्ला स्थानीय तहको नभएको भन्दै त्यसको व्यवस्थापन गर्न नसक्ने बताए । संक्रमितलाई प्रदेश सरकारले नै लगेर व्यवस्थापन गर्नुपर्ने उनको तर्क छ । क्वारेन्टाइनमा राखेका कारण अन्य व्यक्तिहरू त्रसित बनेको र अन्यन्त्र लैजानु पर्ने माग राख्न थालेको गुप्ताले बताए । 

बाँकेपछि प्रदेश पाँचको सबैभन्दा बढी संक्रमित जिल्ला कपिलवस्तु हो । जिल्लाको वाणगंगा नगरपालिकामा संक्रमित धेरै छन् । आइसोलेन अभावले वाणगंगाका संक्रमितलाई अहिलेसम्म क्वारेन्टाइनमै राखिएको नगर प्रमुख मंगलप्रसाद थारूले बताए ।

‘आइसोलेन कहाँ बनाउने भन्ने अझै टुंगो नलाग्दै धमाधम संक्रमित थपिए । संक्रमितलाई सिद्धार्थ क्याम्पसमा बनाइएको क्वारेन्टाइनमै राखिएको छ । सबैलाई छुट्टाछुटै कोठामा राखिएको छ ।’
जिल्लामा अहिले पनि भारतबाट आउनेको संख्या बढ्दो छ ।

रूपन्देहीको गैडहवा गाउँपालिका शनिवार संक्रमण पुष्टि भएकाहरू पनि क्वारेन्टाइनमै छन् । गाउँपालिकाका प्रमुख प्रशासकीय अधिकृत चिरञ्जीवी घिमिरेले आइसोलेन बेड नपाउँदा उनीहरूलाई क्वारेन्टाइनबाट आइसोलेसनमा सार्न नसकिएको बताए । 

‘बुटवलको धागो कारखानास्थित कोरोना विशेष अस्पतालबाट हिजो निको भएर गएकाहरूको ठाउँमा पठाइयो । अरू गाउँकै क्वारेन्टाइनमा छन् ।

पाल्पामा आइसोलेसन खाली रहेछ त्यहीँ पठाउने कि भन्ने छलफल चलिरहेको छ,’ घिमिरेले भने । बाँकेमा संक्रमितको संख्या १४२ पुगेको छ । संक्रमण तीव्र गतिमा फैलिएको छ । अन्य पाँच प्रदेशको तुलनामा प्रदेश ५ मा ढिला गरी कोरोना देखियो । धेरै क्षेत्र भारतसँग जोडिएको प्रदेशमा संक्रमित धेरै भारतबाट आएका हुन् ।

आइसोलेनसमा संक्रमित चिकित्सको निगरानीमा हुन्छन् । तर क्वारेन्टाइनमा चिकित्सकहरू पुग्न सक्दैनन् । प्रदेशले कोरोना उपचारका लागि बनाइएका बुटवलको धागो कारखाना, भैरहवाको भीम अस्पताल, दाङको बेलझुण्डी र बाँकेको सुशील कोइराला प्रखर अस्पताल कोरोनाको बिरामीले भरिएका छन् । 

बुटवलको धागो कारखानमा २ सय बेडको आइसोलनस थप गर्ने भनिएपनि अहिलेसम्म बन्न सकेका छैनन् । प्रदेशका सबै जिल्लामा कम्तीमा ५० बेडको आइसोलेसन बन्न नसक्दा बिरामीको सही रूपमा व्यवस्थापन गरेको उपचारमा समस्या भएको छ । 

प्रदेशका भारतसँग जोडिएका तराईका ६ जिल्लामा भारतबाट आएकाहरूलाई राख्न विद्यालयहरूलाई क्वारेन्टाइन बनाइएको छ । भारतबाट आएकाहरूमा संक्रमण हुने दर तीव्र छ ।

प्रदेश स्वास्थ्य महाशाखा प्रमुख डा. उमाशंकरप्रसाद चौधरीले सबै जिल्लालाई आइसोलेसन बनाएर संक्रमित बिरामीलाई जिल्लामै उपचार गर्ने व्यवस्था गर्न जिल्ला र पालिकालाई निर्देशन गरिएको बताए ।

अबको केही दिनभित्र बुटवलको धागो कारखानाको कोरोना अस्पतालमा २ सय बेड थप गरिने उनले बताए ।  

कुन जिल्लामा कति संक्रमित  

प्रदेश ५ को सबैभन्दा धेरै कोरोना संक्रमित बाँकेमा छन् । बाँकेमा अपडेट १४२ संक्रमित छ ।

बाँकेमा आइसोलेसन अस्पताल र आइसोलेसन सेन्टरमा व्यवस्थापन गरिएको जिल्ला स्वास्थ्य कार्याक्रम बाँकेका फोकल पर्सन नरेश श्रेष्ठले जानकारी दिए । त्यस्तै कपिलवस्तुमा ८० जना संक्रमितमध्ये अस्पतालबाहिर छन् ।

त्यस्तै दाङमा ५, बर्दियामा ३, पश्चिम नवलपरासी ५, रूपन्देही ४० र गुल्मीमा २ लाई संक्रमण देखिएको छ ।