१६ असार २०८३, मंगलबार
विभिन्न विपद्मा परेर कर्णाली प्रदेशका १० जिल्लामा वैशाख १ गतेदेखि हालसम्म २५ जनाको मृत्यु भएको छ ।
प्रदेश प्रहरी कार्यालय सुर्खेतका वरिष्ठ प्रहरी उपरीक्षक राजेशनाथ वास्तोलाका अनुसार बाढी, पहिरो, चट्याङजस्ता विपद्मा परेर २५ जनाको ज्यान गएको हो भने २३ जना घाइते भएका छन् ।
‘नयाँ वर्षको शुरूवात भएसँगै हालसम्म जाजरकोटमा १३ जना, सल्यान र रुकुम पश्चिममा ४/४ जना, कालिकोट र सुर्खेतमा २/२ जनाको मृत्यु भएको छ,’ उनले भने, ‘हालसम्म कर्णालीमा २८४ वटा घरमा क्षति पुगेको छ । जाजरकोटमा १९० घरमा क्षति पुगेको हुँदा यो संख्या बढी देखिएको हो ।’
वैशाखदेखि विपद्मा परेर ५९ वटा चौपायाको ज्यान गएको छ भने ४ चौपाया बेपत्ता भएका छन् । कर्णालीमा पहिरोले सडक अवरुद्ध पारेको छ ।
विपद्का कारण अनुमानित ६ करोड ६५ लाख ५३ हजार ७९० रुपैयाँ क्षति भएको उनले बताए ।
