युवती बलात्कारको अभियोग लागेका सशस्त्र प्रहरी बलका वरिष्ठ प्रहरी उपरीक्षक (एसएसपी) राजेन्द्रकुमार अधिकारीलाई पुर्पक्षका लागि थुनामा राख्ने आदेश दिइएको छ ।

जिल्ला अदालत कास्कीका न्यायाधीश दिपककुमार खरेलको एकल इजलासले अधिकारीलाई थुनामा राखेर मुद्दा पुर्पक्ष गर्न आदेश दिएको हो ।

अदालतका सूचना अधिकारी रामचन्द्र उपाध्यायका अनुसार २ दिनसम्म बहस सुनिसकेपछि पुर्पक्षका लागि थुनामा राख्ने आदेश मंगलवार भएको हो ।

सरकारी वकिलको तर्फबाट जिल्ला न्यायाधीवक्ता गुरुदत्त गौतम लगायत ३ जना र प्रतिवादी तर्फबाट वरिष्ठ अधिवक्ता कृष्णबहादुर थापासहित ६ वकिलले बहस गरेका थिए ।

जिल्ला सरकारी वकिलको कार्यालय कास्कीले उनीविरुद्ध २१ वर्ष जेल सजाय माग गर्दै जबरजस्ती करणी मुद्दामा जिल्ला अदालत कास्कीमा अभियोगपत्र दायर गरेको छ । सरकारी कर्मचारीसहित उच्च पद धारण गरेको व्यक्तिलाई डेढी सजाय हुने व्यवस्था छ ।

पोखराको लामापाटनस्थित सशस्त्र प्रहरी, हुल तथा दंगा व्यवस्थापन तालिम शिक्षालयमा कार्यरत एसएसपी अधिकारीविरुद्ध गत असार ३१ गते चितवनबाट २७ वर्षीया युवतीलाई खाना खान बोलाएर क्वार्टरमै जबरजस्ती बलात्कार गरेको अभियोग छ ।

एकाएक घटना बाहिरिएपछि अनुसन्धानका लागि भन्दै कास्की प्रहरीले एसएसपी अधिकारीलाई पक्राउ गरेको थियो । त्यसपछि ३ पटकसम्म जिल्ला अदालतबाट म्याद थप स्वीकृति लिई प्रहरीले आवश्यक अनुसन्धान गर्दै आएको थियो । जसमा पहिलो पटक ७, दोस्रो पटक ७ र तेस्रो पटक १४ दिन म्याद थप भएको थियो ।

आफूलाई खाना खान बोलाएर अधिकारीले बलात्कार गरेको मौखिक उजुरी ती युवतीले जिल्ला प्रहरी कार्यालय कास्कीको कन्ट्रोल रुम १०० मा टेलिफोनमार्फत दिएकी थिइन् । त्यसपछि प्रहरीले पीडित युवतीलाई भेटेर घटनाबारे थप जानकारीसँगै घटनास्थलको अवलोकन गरी एसएसपी अधिकारीलाई पक्राउ गरेको थियो ।

घटना विवरण अनुसार चितवनबाट सोही दिन बिहान स्कुटर चढेर आएकी युवती खाना खाने निम्तो मान्न लामापाटनस्थित एसएसपी अधिकारी बस्ने क्वार्टरमै गएकी थिइन् । खानामा लठ्याउने चिज हालेर अधिकारीले आफूमाथि जबरजस्ती बलात्कार गरेको उजुरी दिएपछि कास्कीका प्रहरी प्रमुख प्रहरी उपरीक्षक (एसपी) जीवनकुुमार श्रेष्ठ नेतृत्वको टोलीले अधिकारीलाई शिक्षालय परिसरको झाडीमा लुकीछिपी रहेको अवस्थामा पक्राउ गर्न सफल भएको थियो । स्रोतका अनुसार सो दिन एसएसपी अधिकारीको क्वार्टरमा रहेका सामानहरू छरपस्ट थिए ।

उनको सरुवाको अघिल्लो दिन मात्र सो घटना भएको थियो । स्याङ्जाका अधिकारी १ वर्षदेखि लामापाटनमा प्रमुखमा कार्यरत थिए ।