प्रायः प्रशंसा र माया मात्र पाइरहने अनि असाध्यै कम विवादमा मुछिने महानायक राजेश हमाल पछिल्लो समय टेलिभिजन कार्यक्रम ‘जातको प्रश्न’बाट आलोचनाको घेरामा परे ।

क्रिश्चियनहरूको लगानीमा हिन्दूविरोधी कार्यक्रम बनेको भन्दै सामाजिक सञ्जालमा चर्को विरोध भयो । सडकमा समेत छिटफूट विरोधका स्वरहरू सुनिए ।

जातको प्रश्नका सबै शृंखला प्रशारण भइसकेका छन्, तथापि महानायक हमालबारे सामाजिक सञ्जालमा तर्क–बितर्क अझै सेलाएका छैनन् ।

यस विषयमा महानायक हमाल चुपचाप थिए । तर, लोकान्तरसँगको छोटो भेटमा हमालले आफ्नो धारणा राखेका छन् ।

‘एकपटक ‘जातको प्रश्न’का सबै शृंखला हेर्नुभयो भने कतै पनि क्रिश्चियन धर्मको प्रचार गरिएको छ जस्तो मलाई लाग्दैन’, अभिनेता हमालले लोकान्तरसँग भनेका छन्, ‘त्यसैले यसमा कसको लगानी थियो भनेर खासै बहस गर्न जरुरी पनि छैन ।’

हरेक धर्म, जात, संस्कृति र रितिरिवाजको असाध्यै सम्मान गर्ने भन्दै हमालले आफ्ना शुभेच्छुकहरूलाई आफू कहिल्यै विवादमा तानिने किसिमका गतिविधिमा संलग्न नरहने समेत स्पष्ट पारेका छन् । 

अभिनेता हमालले जुनसुकै विषय र व्यक्तिबारे तर्क–वितर्कमा उत्रर्नुअघि उक्त विषयमा स्पष्ट रूपमा जानकारी समेत लिनुपर्ने बताए । यस्ता खालका कार्यक्रम अझै बन्न सके नेपाली समाज र दलितहरूप्रतिको विभेद अन्त्य हुन सक्ने हमालको तर्क छ ।

हमालको यो कार्यक्रममा विभिन्न क्षेत्रका अतिथिहरूले नेपालमा भइरहेका जातीय विभेद र छुवाछुतका बारेमा आफ्नो धारणा राखेका थिए ।

समता फाउन्डेसनले ‘जातको प्रश्न’ नेपाली समाजको विभेद र छुवाछुत अन्त्यका लागि भन्दै कान्तिपुर टेलिभिजनबाट प्रशारण गरेको थियो ।

शुरूका सबै कार्यक्रमलाई दर्शकहरूले मन पराएका थिए । तर, एपिसोडको अन्त्यतिर यो कार्यक्रम र सञ्चालक विवादमा मुछिएका हुन् ।

‘क्रिश्चियन एड नेपाल’को लगानी रहेको उक्त कार्यक्रममार्फत् उनले समाजप्रति कुठाराघात गरेर खलनायकको भूमिका निर्वाह गरेको आरोप समेत लगाइएको थियो । 

कार्यक्रमको चर्को विरोध भइरहेका बेला काठमाडौंमा हमालको पुत्ला समेत जलाइएको थियो । हमालले सम्भवतः पहिलोपटक आफ्नो पुत्ला जलाइएको दृश्य देखे ।

हमालका शुभेच्छुक र नेपाली चलचित्रका केही अग्रजहरू हमाललाई विवादमा तान्न खोजिएको भन्दै यसमा धेरै विवाद गर्न आवश्यक नभएको बताउँछन् ।

उनीहरू भन्छन्, ‘कतिपयले धेरैलाई लगानीकर्तासँग होइन दलितका विषयमा उठान गरिएका सवालदेखि असन्तुष्टि लागेजस्तो देखियो ।  यस्ता किसिमका कार्यक्रम अझै धेरै बन्नुपर्छ । क्रिश्चियन अथवा अलकायदाले निर्माण गरेपनि खासै फरक पर्दैन ।’

समता फाउन्डेसन के भन्छ ?

कार्यक्रम विवाद परेपछि समता फाउन्डेसनले समेत स्पष्टीकरण दिएको छ । कार्यक्रमको मुख्य उद्देश्य जातीय विभेद सम्बन्धमा घर–घरमा संवादको शुरूआत गर्नु रहेको र कार्यक्रममा कुनै निश्चित जात, धर्म, लिङ्ग, क्षेत्रप्रति कुनै पनि प्रकारको पूर्वाग्रह नराखेको फाउन्डेसनले जनाएको छ ।

दलित समुदायविरुद्ध भइरहेका शृंखलाबद्ध हिंसा र विभेदबारे सरोकारवाला पक्ष र समुदायस्तरमा पनि संवादको संस्कृति बढाउन उक्त कार्यक्रम ल्याइएको फाउन्डेसनका अध्यक्ष प्रदीप परियारले बताए ।