१२ घरका कारण अल्झियो चक्रपथको दोस्रो खण्ड विस्तारको काम [भिडियो रिपोर्ट]

विश्वास खनाल
विश्वास खनाल

खनाल लोकान्तरका मल्टिमिडिया संवाददाता हुन् ।

करीब ९८ प्रतिशत साइट क्लियर भइसक्दा पनि चक्रपथको दोस्रो खण्ड (कलंकी–धोवीखोला) सडक विस्तारको काम शुरू हुने मिति टुंगो लाग्न सकेको छैन ।

चीन सरकारको सहयोगमा हुने स्तरोन्नतिको काम काम शुरू गर्नका लागि पहिले नेपाली पक्षले साइट क्लियर गरी दिनुपर्ने हुन्छ । 


Advertisement

महाराजगञ्जका १२ घरको मुआब्जा विवादका कारण काम कहिले शुरू हुने भन्ने टुंगो लाग्न नसकेको हो । नारायणगोपाल चोकमा २४४ मिटर क्षेत्रभित्रका ती घरधनीले कागजपत्र समेत नबुझाउँदा मुआब्जाको प्रक्रिया अघि बढ्न सकेको छैन ।

त्यस क्षेत्रमा विवाद देखिएका कुल १९ मध्ये ७ घरधनीले कागजपत्र बुझाएको र ६ वटा घरको मुआब्जा तथा क्षतिपूर्ति मूल्यांकन भइसकेको सडक विभागअन्तर्गत संघीय सडक सुपरिवेक्षण तथा अनुगमन कार्यालय काठमाडौं, सडक डिभिजन ललितपुरका प्रमुख अर्जुन सुवालले बताए ।

ती घरहरू कलंकी–घोवीखोला (चाबहिल पुल) सडक खण्डको सर्भिस लेनमा पर्छन् । थोरै समस्या स्वयम्भूमा चैतन्य अगाडि पनि छ । तर त्यहाँ ठूलो समस्या नरहेको सुवाल बताउँछन् । कुल ११ दशमलव ६ किमी लम्बाइको सडक खण्डमध्ये २४४ मिटरमा समस्या रहेको उनको दाबी छ ।

शत प्रतिशत साइट क्लियर नभई काम शुरू नगर्ने चिनियाँ पक्षको अडान छ । 

रुख कटान, विभिन्न कार्यालय तथा घरहरूको पर्खाल भत्काउने र बिजुलीको पोल सार्ने काम लगभग सकिएको सुवालले बताए । उनका अनुसार ९८.९% साइट क्लियर भैसकेको छ ।
विवाद रहेको यो क्षेत्रलाई तत्कालका लागि थाती राखेर अरू कामलाई निरन्तरता दिन माथिल्लो निकायलाई अनुरोध गरिएको उनले बताए ।

गत वर्षको पुसमा मन्त्रिपरिषद्को निर्णयबाट सडकको दायाँबायाँ दुवैतिर ३१/३१ मिटर क्षेत्र अधिग्रहण गरी खाली गराउने प्रक्रिया अगाडि बढेको थियो ।

डीपीआर समेत तयार गरिसकेको चिनियाँ पक्षले काम शुरू भएको ३ वर्षभित्र सम्पन्न गर्ने बताउँदै आएको छ ।

चिनियाँ पक्षले नै यसअघि कलंकी–बल्खु–कोटेश्वर खण्डको स्तरोन्नति गरिसकेको छ ।

हेर्नुहोस्, भिडियो :

 

 

विश्वास खनाल
विश्वास खनाल

लेखकबाट थप...

कमेन्ट गर्नुहोस्