शिक्षकलाई कोरोना भाइरस संक्रमण भएपछि सिन्धुपाल्चोकको चौतारा साँगाचोकगढी नगरपालिका–७ सानु सिरुवारीस्थित सिद्धिगणेश मावि शुक्रवारदेखि अनिश्चितकालका लागि बन्द गरिएको छ ।

विद्यालयका प्रधानाध्यापकलाई मंगलवारदेखि कोभिड–१९ संक्रमण पुष्टि भएपछि विद्यालय व्यवस्थापन समितिको बैठकले अनिश्चितकालका लागि विद्यालय बन्द गर्ने निर्णय गरिएको सहायक प्रधानाध्यापक तिलकबहादुर दङ्गालले जानकारी दिए ।

उनको सम्पर्कमा आएका शिक्षक, विद्यार्थी तथा स्वास्थ्यकर्मीसहित २२ जनाको शुक्रवार जिल्ला स्वास्थ्य कार्यालयबाट आएका स्वास्थ्यकर्मीले विद्यालयबाटै स्वाब संकलन गरेर लगेका छन् । त्यसको रिपोर्ट आइतवारसम्म आइपुग्ने बताइएको छ ।

संक्रमित शिक्षक अहिले काठमाडौंमा होमक्वारेन्टीनमा रहेका शिक्षक ताराबहादुर श्रेष्ठले बताए ।