कोरोनाभाइरस (कोभिड- १९) संक्रमणको दोस्रो लहर फैलिएपछि दुई सातादेखि राजधानी काठमाडौंमा निषेधाज्ञा छ ।

निषेधाज्ञाका कारण दैनिक ज्यालादारी गरेर जीविकोपार्जन गर्नेहरूको गाँस नै खोसिएको छ ।

कैयन नागरिक बिहान-बेलुका हातमुख जोर्न नपाएर ब्याकुल छन् । सडकमा पुग्दा यस्ता बेसहाराहरूको ताँती देख्न सकिन्छ ।

निषेधाज्ञाको समयमा वसन्तपुर पुग्दा एक महिला त्यहाँ भेला भएका असहायहरूलाई खाना खुवाउँदै थिइन् ।

नजिक पुगेर हामीले उनीबारे जिज्ञासा राख्यौं । नाम रहेछ, रसना पौडेल ।

कोभिड- १९ को अघिल्लो लहरमा लकडाउनका बेला यसैगरी खाना खुवाएको बताउने पौडेल अहिले पनि निषेधाज्ञा लागू भएदेखि नै यही काममा सक्रिय रहेछिन् ।

उनलाई देख्नेबित्तिकै को आउला र खाना देला भनेर पर्खिरहेकाहरू लामबद्ध भए ।

लामबद्ध हुनेहरू प्राय: सडकपेटीमा जीविकोपार्जन गर्नेहरू नै थिए । यो दृश्य देख्दा प्रधानमन्त्रीले सडकमा अब कोही भोका छैनन् भनेको याद आयो ।

संकटका बेला सरकारको साथ नपाएका असहाय गरीबहरू यस्तै मनकारीहरूका कारण जेनतेन पेट पालिरहेका छन् ।

उनले काठमाडौंमा बेघरबार भएर यत्तिकै हिँडेका मान्छेदेखि भारी बोक्ने र रिक्सा चलाएर गुजारा गर्नेसम्मलाई खाना खुवाएकी छिन्।

काठमाडौंको न्युरोड र वसन्तपुर दरबार क्षेत्रका कामविहीन श्रमिकहरूलाई खाना खुवाउँदै आएको उनले बताइन् ।

त्यसक्रममा खाना खान पुगेका केही व्यक्तिसँग पनि हामीले कुराकानी गर्‍यौं ।

देशमा कोही भोको छैन । सडकमानव कोही पनि छैनन्, देश भिखारीमुक्त भइसकेको छ भन्ने भाषणहरूले यी दृश्यले गिज्याइरहेका छन् । यस्ता असहायहरूमा सरकारको ध्यान कहिले जाला खै  ?

हेर्नुहोस्, भिडियो रिपोर्ट :