नेपाली कांग्रेसको पेशागत संगठन नेपाल शिक्षक संघको राजनीति गर्दै आधारभूत विद्यालय तहका स्थायी शिक्षक बिर्खबहादुर मल्ल कञ्चनपुरको भीमदत्त नगरपालिकास्थित लक्ष्मी मावि खैरभट्टीका प्रधानाध्यापक थिए । उनी शिक्षक संघका सुदूरपश्चिम प्रदेश अध्यक्ष हुन् ।

हालै भीमदत्त नगरपालिकाले दरबन्दी मिलान गर्दै मल्ललाई प्रधानाध्यापकबाट हटायो । माध्यमिक तहको विद्यालयमा आधारभूत तहको शिक्षक प्रधानाध्यापक हुन नपाइने मापदण्डअनुसार मल्ललाई प्रअबाट हटाइएको थियो । तर आफूलाई प्रअबाट हटाएको झोकमा मल्लले कांग्रेसनिकट शिक्षकलाई भेला गराएर नगरपालिकाविरुद्ध आन्दोलन शुरू गराए ।

संघका अध्यक्ष मल्लले सरकारी तलब खाएर सदरमुकाम महेन्द्रनगरमा निजी विद्यालय समेत सञ्चालन गरिरहेका छन् । उनी महेन्द्रनगरको कटानस्थित वेस्टर्न पब्लिक एकेडेमीका सञ्चालक हुन् ।

मल्ल मात्रै होइन, शिक्षक संघकै नेता देवबहादुर खाती आधारभूत तहका शिक्षक भएर लामो समयदेखि वैजनाथ आधारभूत विद्यालय वनकट्टी प्रधानाध्यापक थिए । नगरपालिकाको शिक्षक दरबन्दी मिलानबाट विद्यालयमा वरिष्ठतम शिक्षक आएपछि उनको प्रअ पद खोसियो । त्यसपछि शिक्षक संघकै आन्दोलनमा उनी पनि होमिए ।

दरबन्दी मिलानका क्रममा विद्यालयको शैक्षिक र प्रशासनिक सुधारका लागि वरिष्ठतम शिक्षकलाई जिम्मेवारी दिँदा कांग्रेसनिकट शिक्षकहरू नगरपालिकाविरुद्ध आन्दोलन गरिरहेका छन् ।

‘दरबन्दी मिलानले धेरैको प्रअ पद खोसिएको छ, खाइपाई आएको सुविधा र विद्यालयमा पढाउनेभन्दा राजनीति गर्न सजिलो थियो, अब प्रअ फेरिएपछि नयाँ प्रअले काम हेर्छ, पढाएको हेर्छ, मनपरी घुम्न पाइँदैन भन्ने डर हो,’ एक शिक्षकले भने ।

भीमदत्त नगरपालिकाको शिक्षा शाखाका प्रमुख हरिदत्त जोशीले दरबन्दी मिलानले लामो समयदेखि तल्लो तहको शिक्षकले माथिल्लो तहको विद्यालय चलाउँदै आएकोमा अब समस्या समाधान भएको बताए । वरिष्ठतम शिक्षकले विद्यालयको नेतृत्व गर्दा विद्यालय र शिक्षकको कार्यसम्पादन समेत राम्रो हुने उनले बताए ।