ब्राजिलको दुके दे कासियास शहरमा एक गर्भवती महिला दोस्रो तल्लाको झ्यालबाट हाम्फालेर भाग्न खोजेको कारुणिक भिडियो सार्वजनिक भएको छ । 

पतिले कुटपिट गरेपछि भाग्न खोजेकी महिलालाई पतिले झ्यालबाट घिसारेर कोठातर्फै लगेका थिए । 

शनिवार छिमेकीहरूले यो घटनाको भिडियो खिचेका हुन् । 

भिडियोमा मारिया जोसेले आफ्नो देब्रे गोडा झ्यालमा राखेको तर उनका पति भिटोर बाटिस्टाले उनको टाउको समातेर कोठातिरै तानेको देखिन्छ । 

छिमेकीहरूले प्रहरीलाई बोलाएपछि बाटिस्टा पक्राउ परेका थिए । 

जोसेले गुहार, मलाई बचाऊ लेखिएको एउटा नोट झ्याल बाहिर फालेको थाहा पाएपछि बाटिस्टाले रिसले चुर हुँदै पत्नीलाई कुटपिट गरेका थिए । 

उनले प्रहरीलाई यो सामान्य झगडा मात्र भएको बताएका थिए । 

जोसेले चाहिँ आफूलाई पतिले बिहे गरेको दुई वर्षमा लगातार कुटपिट गर्ने गरेको बताइन् । 

गत मे महिनामा पनि उनी भाग्नका लागि झ्यालबाट हाम्फाल्न खोजेकी थिइन् । 

‘ऊ एकदमै ईर्ष्यालु थियो र पोजेजिभ पनि । मलाई बाहिर जानै दिँदैनथियो । मैले जागिर समेत गुमाएँ,’ जोसेले भनिन् । 

‘उसले ममाथि आक्रमण गरेपछि मलाई मानसिक समस्या आउन थाल्यो र काम गर्न सकिनँ । म घरैभित्र बसिरहें अनि हाकिमसँग बहाना बनाइरहें,’ उनले थपिन् ।

प्रहरी सुपरिवेक्षक फर्नान्डा फर्नान्डेजले छिमेकीहरूबाट कल नआएको भए जोसेको ज्यान पनि जान सक्नेथियो भने ।