०७ असार २०८३, आइतबार
जनकपुरधामको शक्ति पीठहरूमा खोंइछ भर्ने तथा लड्डु चढाउने भक्तजनको भीड लागेको छ ।
राजा जनकको कूलदेवीका रूपमा चिनिने जनकपुरको प्रसिद्ध शक्ति पीठ राजदेवी मन्दिर, धनुषा रमदैयास्थित राजदेवी मन्दिर, महेन्द्रनगरको दुर्गा मन्दिर, महोत्तरीको सोनामाई मन्दिर, सप्तरीको छिन्नमस्ता भगवती मन्दिर र कंकालिनी मन्दिरलगायत शक्तिपीठमा बुधवार बिहानैदेखि श्रद्धालु भक्तजनको भीड लागेको हो ।
सन्तानको दीर्घायु तथा पारिवारिक सुख, शान्ति तथा समृद्धिको कामना गर्दै मिथालानीहरू खोंइँछ भर्ने गर्छन् । मिथिलामा माता दुर्गाको ‘खोंइछ’ भर्ने विधि निकै पौराणिक हो ।
सप्तमीको साँझदेखि नै मिथिलानीहरूले ‘खोंइछ’ भर्ने गर्दछन् । यस वर्ष तिथिको हेरफेरले गर्दा सप्तमी, अष्टमी र कतिपयले अष्टमीको राति १२ बजेपछि ‘खोंइछ’ भर्ने पण्डितहरू बताउँछन् ।
मिथिलामा छोरी घरबाट बाहिरिँदा उनलाई ‘खोंइछ’ दिने गरिन्छ । ‘खोंइछ’मा पान, सुपारी, पैसा, धान वा चामल, सिन्दूर, बेसार, फूल र फल राखेर नयाँ कपडामा बाँधेर छोरीलाई दिने चलन छ । ‘खोंइछ’ भर्दा धनधान्यको प्राप्ति हुने र घरपरिवारमा सुखशान्ति हुने जनविश्वास रहेअनुसार मिथिलानीहरू दुर्गामाताको खोंइछ भर्ने गर्दछन् ।
खोंइछ भर्नका लागि हजारौंको संख्यामा महिलाहरू राजदेवी मन्दिरसहित रामानन्द चोक, मुरली चोक लगायतका स्थानमा खोंइछ भरिरहेका छन् ।
प्रसाद चढाउनका लागि मंगलवार राति ११ बजेदेखि नै ठूलो लाइन लागेको छ । राजदेवी मन्दिरमा प्रत्येक वर्ष खोंइछ भर्न महिलाहरूको भीड लाग्छ । जनकपुरमा आज रातिदेखि बलि दिने भएको छ । त्यसका लागि नेपालसहित भारतको सीमावर्ती क्षेत्रबाट श्रद्धालु भक्तजनहरु बोका बलिका लागि जनकपुर जाने गरेका छन् ।
प्रत्येक वर्ष राजदेवी मन्दिरमा मात्र हजारौंको संख्यामा बलि प्रदान हुने गरेको छ ।
