पूर्वप्रधानमन्त्री एवं नेकपा (माओवादी केन्द्र)का अध्यक्ष पुष्पकमल दाहाल प्रचण्ड पारिवारिक भ्रमणका क्रममा धुलिखेल पुगेर साहसिक जीपलाइन चढेपछि सामाजिक सञ्जालमा विभिन्न टिप्पणीहरू भए । जनता बाढीपहिरोको मारमा परेका बेला प्रचण्डले यसरी जीप लाइनको आनन्द लिनु सही नभएको धेरैको तर्क थियो । 

तर, प्रचण्डले जीपलाइन चढेपछि धुलिखेलको पर्यटनमा भने यसले निकै फाइदा पुर्‍याएको छ । अहिले धुलिखेलमा जीपलाइन चढ्न आउने आन्तरिक  पर्यटकहरूको संख्या ह्वात्तै बढेको जीपलाइनका सञ्चालक वर्ल्ड वाइड एड्भेन्चर प्रालि अध्यक्ष केदार थापाले बताए । 

‘विगतमा भन्दा दोब्बर तेब्बर मानिसहरू आउनु भएको छ, धेरै परिवारसहित नै आउनु भएको छ,’ उनले भने, ‘देशैभर प्रचारप्रसार भएर होला हिजो र आज त भ्याईनभ्याई भयो, धेरैले लोकेसनको लागि फोन गरेर पनि बुझिरहनु भएको छ ।’

उनका अनुसार धेरैलाई धुलिखेलमा जीपलाइन छ भन्ने प्रचण्ड आएपछि मात्रै थाहा भयो । ‘उहाँको अनावश्यक विरोध भइरहेको देखेको छु तर आन्तिरक पर्यटनको लागि त राम्रो भएको छ,’ उनले भने । 

जीपलाइनको टेक अफ (थाक्लेडाँडा, धुलिखेल) देखि ल्यान्डिङ स्टेसन (खावा, पाँचखाल) सम्मको जीपलाइन दूरी  ११ सय मिटर छ । भर्टिकल ड्रप २४० फिट रहेको जीपलाइन ७० किलोमिटर प्रतिघण्टाको औसत गतिमा पार हुन्छ ।

काठमाडौंबाट करीब ३५ किलोमिटर दूरीमा रहेको जीपलाइन २०७५ फागुनदेखि व्यवसायिक रुपमा शुरू भएको हो । धुलिखेलस्थित थाक्लेडाँडाबाट टेक अफ भई खावा, पाँचखालमा जीपलाइनको ल्याण्डिङ स्टेसन छ । क्लासिक, सुपरम्यान र टेन्डम (जोडी) गरी ३ प्रकारका जीपलाइन खेल्न पाइन्छ । 

खावास्थित ‘ल्यान्डिङ स्टेसन’मा ८ फरक एडभेन्चर कोर्ससहित एडभेन्चर पार्क छन् । त्यहाँबाट लाङटाङ, दोर्जेलाक्पा, फूर्बीच्याचूलगायतका हिमालसमेत अवलोकन गर्न सकिनेछ ।

कोरोना कहरले बन्द भएको धुलिखेल जीपलाइन ६ महिना बन्द भएको थियो । क्लासिक जीपलाइनको २ हजार ५ सयमा छुट गरी १ हजार ७ सय ५०, सुपरम्यान  जिपलाइनको ३ हजार पाँच सयमा छुट गरी २ हजार ४ सय ५० र टेण्डम ९जोडी० जीपलाइनको ४ हजार ५ सयमा छुट गरी ३ हजार १५० शुल्क लाग्छ । जीपलाइनसँगै फोटो-भिडिओ प्याकेजमा समेत छुटसमेत छ । 

क्लासिक र सुपरम्यान जीपलाइनमा फोटो र भिडिओको लागि ७०० रूपैयाँ लाग्ने भए पनि हाल २०० रूपैयाँ कायम गरेको र  टेन्डम (जोडी) जीपलाइनमा फोटो र भिडिओको लागि एक हजार रूपैयाँ लाग्ने भए पनि हाल ३०० रूपैयाँ कायम गरिएको छ । 

२०७५ फागुनदेखि व्यवसायिक रूपमा धुलिखेल जीपलाइन शुरू भएको हो । धुलिखेलस्थित थाक्लेडाँडाबाट टेक अफ भई खावा, पाँचखालमा जीपलाइनको ल्याण्डिङ स्टेसन छ । क्लासिक, सुपरम्यान र टेण्डम (जोडी) गरी ३ प्रकारका जीपलाइन खेल्न पाइन्छ । 

जीपलाइनसँगै ट्रि अप (रूखमाथि नै बसेर खान मिल्ने गरी बनाइएको) रेस्टुरेन्ट पनि छ । खावास्थित ‘ल्यान्डिङ स्टेसन’मा ८ फरक एडभेन्चर कोर्ससहित एडभेन्चर पार्क छन् । त्यहाँबाट लाङटाङ, दोर्जेलाक्पा, फूर्बीच्याचू लगायतका हिमाल समेत अवलोकन गर्न सकिनेछ।

सिन्धुपाल्चोकका केदार थापा अध्यक्ष र काठमाडौका भुपेश श्रेष्ठले वर्ल्ड वाइड एड्भेन्चरमार्फत् धुलिखेल जीपलाइन, रिसोर्ट र एडभेन्चर पार्क सञ्चालनमा ल्याएका हुन् ।