१६ असार २०८३, मंगलबार
केही दिनअघि अमेरिकाको एक कम्पनीमा भारतीय मूलका सीईओ विशाल गर्गले बेटर डट्कमका ९०० जना कर्मचारीलाई एकैपटक जूम कलमार्फत निकालिदिएका थिए ।
कर्मचारीहरूको प्रोडक्टिभिटी कमजोर बनेकाले निकालेको तर्क उनले गरेका थिए । यसरी एक जूम कलको भरमा यति धेरै कर्मचारीलाई निकालिएपछि गर्गलाई सामाजिक सञ्जालमा आलोचना गरिएको छ ।
कम्पनीका ननिकालिएका कर्मचारीले पनि यस कामलाई चित्त बुझाएनन् ।
चौतर्फी आलोचना भएपछि गर्गले घटनाका लागि माफी मागेका छन् ।
कम्पनीका कर्मचारीहरूलाई निकालिएको जानकारी दिनमा ठूलो चुक गरेको गर्गले स्वीकारे । यसरी कर्मचारी निकालन हुँदैनथियो, उनले भने ।
कम्पनीले हालैको समयमा राम्रो फन्डिङ पाएको र फेरि पनि पाउन लागेको बेलामा कर्मचारी निकाल्नुमा गर्गको नियत पनि सफा नदेखिएको आलोचकहरू बताउँछन् । निकाल्नु नै थियो भने पनि एक एकजनालाई अफिसमा बोलाएर सूचना दिनुपर्थ्यो ।
निकालिएकामध्ये एक कर्मचारीले जूम कललाई मोबाइलमा रेकर्ड गरेर सामाजिक सञ्जालमा राखेपछि त्यो भाइरल भएको थियो । अहिले गर्गले यसरी अपमानजनक ढंगले कर्मचारी निकालेकोमा माफी मागेका छन् ।
