१० असार २०८३, बुधबार
युक्रेनको एक टेलिभिजनमा प्रत्यक्ष प्रसारण चल्दै गर्दा एक पत्रकारले रुससमर्थक राजनीतिकर्मीको मुखमा मुक्का प्रहार गरेका छन् ।
रुसका राष्ट्रपति भ्लादिमिर पुटिनका विषयमा बहस चलिरहँदा पत्रकार र राजनीतिकर्मी भिडेका हुन् ।
रुससमर्थक दल अपोजिसन प्ल्याटफर्म फर लाइभका सांसद नेस्टोर शुफ्रीच र पत्रकार युरी बुतुुसोभबीच झगडा भएको हो ।
पुटिनको निन्दा शुफ्रीचले गर्न नमानेपछि बुतुसोभले उनलाई मुक्की हानेका हुन् ।
मुक्की खाएपछि शुफ्रीचको अनुहारबाट रगत आएको थियो । यस घटनालाई पूर्व प्रधानमन्त्री आर्सेनी यातसेनयुक र पूर्वराष्ट्रपति पेट्रो पोरोशेन्कोले हेरेका थिए ।
बुतुसोभले मुक्का प्रहार गरेपछि शुफ्रीच पनि प्रत्याक्रमण गर्न थालेका थिए । त्यसपछि दुवैजना भुइँमा लडेका थिए । बुतुसोभले शुफ्रीचको घाँटी अँठ्याउन थालेपछि अन्य अतिथिहरूले उनीहरूलाई रोकिनका लागि अनुरोध गरेका थिए ।
पछि उनीहरू छुट्टिएका थिए र बहस जारी राखेका थिए ।
शुफ्रीचलाई पुटिन हत्यारा र अपराधी हुन् कि हैनन् भनी सोधिएको थियो । तर उनले त्यसको उत्तर दिएनन् र भने, ‘युक्रेनका अधिकारीहरूले नै त्यस विषयमा कुरा गरून् ।’
