पोखरा महानगरको मेयर उम्मेदवार बन्न आकांक्षा राख्दै नेपाली कांग्रेसका १८ जनाले निवेदन दिएका छन् । 

नेपाली कांग्रेस नगर समितिले गरेको आह्वानअनुसार मेयरका लागि १८ जनाले निवेदन दिएका कांग्रेस पोखरा महानगर समितिका प्रवक्ता टुवराज बास्तोलाले लोकान्तरलाई जानकारी दिए । 

मेयरका लागि सुदीप मोहन भट्टराई, डा. परमेश्वर पोखरेल, निर्मलप्रसाद कर्माचार्य, कृष्णबहादुर केसी, बाबुराम आचार्य र सरस्वती गुरुङले निवेदन दिएका छन् । 

यसै गरी नन्दप्रसाद तिवारी, गंगाधर पराजुली, वीरेन्द्रनारायण बिजुक्क्षे, विश्वशंकर पालिखे र किशोरदत्त बरालले उम्मेदवारीका लागि निवेदन दिएको बास्तोलाले जानकारी दिए । 

मेयरकै लागि बिन्दुकुमार थापा, बाबुराम गिरी, गणेशबहादुर भट्टराई, किरण केसी, कोपिला रानाभाट, विश्व घिमिरे र श्रृषी सापकोटाले नाम दर्ता गराएका छन् । प्रदेशका मन्त्रीसमेत रहेका बिन्दुकुमार थापाले पनि दरखास्त दिएका छन् । 

प्रदेश सांसद रहेका थापा गण्डकी प्रदेश सरकारको सञ्चार, कानून तथा प्रदेश मामिला मन्त्री छन् । किशोरदत्त बराल कांग्रेस कास्कीका सभापति हुन् । 

पोखरा महानगरको उपमयेरका लागि माया बराल कार्की क्षेत्री, लक्ष्मी पाण्डे क्षेत्री, आन्दी राणा कार्की, रंगिला आचार्य, टीकाकुमारी गुरुङ, दीपक मल्ल, मिलन थापा र चिनु गुरुङले आकांक्षा दर्ता गरेका छन् । ​यस्तै शिव केसी र गोविन्द नेपालीले पनि अन्तिममा उपमेयरका लागि निवेदन दिएका छन् । योसँगै उपमेयरका लागि आकांक्षीको संख्या १० पुगेको छ ।

मेयरमा आकांक्षा दर्ता गर्नका लागि २५ हजार र उपमयेरका लागि २० हजार रूपैयाँ शुल्क तिरेका छन् । कांग्रेस महानगर समितिका अनुसार यो शुल्क पार्टीलाई सहयोगबापत आकांक्षीले स्वेच्छाले दिएका हुन् ।

मनोनयनको लागि आइतवार ४ बजेसम्मको समय तोकिएको थियो । प्राप्त आवेदनमाथि छलफल गरेर छोटो सूची केन्द्रमा पठाउने कांग्रेसको तयारी छ । 

वैशाख ३० गते हुने स्थानीय तह निर्वाचनका लागि वैशाख ११ र १२ गते उम्मेदवारी मनोनयनको कार्यक्रम छ । गठबन्धन दलबीच भोलिसम्ममा महानगर र उपमहानगरबीच तालमेल गरेर केन्द्रलाई जानकारी गराउन निर्देशन दिने सहमति भएको थियो । पोखरा महानगरको नेतृत्वका लागि नेकपा एसले पनि दाबी गरेको छ । 

गत स्थानीय तह निर्वाचनमा नेकपा एमालेले कांग्रेससँग फराकिलो मतान्तरले मेयर जितेको थियो ।