पछिल्लो साता युट्युबमा दुई दर्जन बढी गीतहरू सार्वजनिक भए । 

गायक प्रमोद खरेलले स्वर दिएका थुप्रै गीतहरू पछिल्लो साता युट्युबमा आएका छन् । उनको स्वरमा ‘भन निष्ठुरी’, ‘पानी मिठो सलल बग्ने खोलीको’, ‘चुपचाप मन पराएँ’, ‘यो सब तिमीले गर्दा हो’ जस्ता गीतहरू युट्युबमार्फत् सार्वजनिक भए । 

त्यस्तै, सुगम पोखरेल, प्रताप दासदेखि अन्जु पन्त, मेलिना राई, एलिना चौहान, रचना रिमालले स्वर दिएका गीतहरूसमेत युट्युबमा सार्वजनिक भएका छन् । 

यता, अभिनेता राजेश हमाल अभिनित म्युजिक भिडियो पनि पछिल्लो साता सार्वजनिक भएको छ । प्रमोद खरेल र रचना रिमालको स्वरमा रहेको ‘पानी मीठो सलल बग्ने खोलीको’बोलको गीतको भिडियोमा अभिनेता हमाल मोडल सरु ढकालसँग प्रस्तुत छन् । 

आकाश श्रेष्ठ र वर्षा राउत अभिनित ‘धन्यवाद’, सुगम पोखरेल र अन्जु पन्तको स्वर तथा पूजा शर्मा र आकाश श्रेष्ठको अभिनयमा ‘स्वर्गकी अप्सरा’बोलको गीत युट्युबमा सार्वजनिक भयो । पुष्प खड्का र अन्जली अधिकारी अभिनित ‘मेरो मुटु’ पछिल्लो साता युट्युबमा सार्वजनिक भयो भने पुष्पले अभिनय गरेको ‘बेचेर सपना’बोलको गीत पनि सार्वजनिक भएको छ । 

प्रविशा अधिकारी र प्रताप दासको स्वर तथा लक्ष्मी बर्देवा र जिम्बे राईको अभिनयमा ‘माया बिछट्टै’पछिल्लो साता सार्वजनिक भयो भने गायक देबेन्द्र बब्लूले अस्मिता अधिकारीसँगको स्वरमा आफ्नो गीत ‘हिरोनी’ पछिल्लो साता सार्वजनिक गरे । विवाहको सिजनलाई लक्षित गर्दै ईश्वर सिंह र शान्ती रानी परियारको स्वर तथा विनोद भण्डारी र नारायणी खत्रीको अभिनय रहेको ‘शिरफूल शिरको’बोलको पञ्चेबाजा गीत पनि पछिल्लो साता सार्वजनिक भयो । 

उर्गेन दोङ, मिष्टर आरजे र एलिना चौहानको स्वर तथा सागर लम्साल ‘बले’, आकृति शर्मा, उर्गेन दोङ र मिष्टर आरजे अभिनित ‘के साह्रो’बोलको गीत पनि पछिल्लो साता सार्वजनिक भएको छ । कलाकार सागरले आफ्नो ‘बले इन्टरटेन्मेन्ट’मार्फत यो गीत सार्वजनिक गरेका छन् । 

मेलिना राई र हिमाल श्रेष्ठको स्वरमा ‘द कार्टुन क्रु’का कलाकारहरूको अभिनय रहेको ‘ज्यानै दिउँला’बोलको गीत पनि पछिल्लो साता सार्वजनिक भएको छ । 

यी बाहेक ‘देशलाई फेरि एमाले चाहिया छ’, ‘जय नेपाल भोट के मा रुखमा’, ‘मेरो देशै एमाले’ जस्ता चुनावी गीतहरू पनि युट्युबमा सार्वजनिक भए । पछिल्लो साता थुप्रै गीतहरू सार्वजनिक भएपछि अपेक्षित भ्युज भने अधिकांश गीतले पाउन सकेका छैनन् ।

रुचाइएका गायक/गायिकाको स्वर तथा चलेका कलाकारहरूको अभिनय रहेका गीतको भ्युज पनि निकै कम देखिन्छ ।