नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले बालेन नेतृत्वको सरकारका सय दिन फाँसीजमतर्फको यात्रा भएको टिप्पणी गरेका छन् ।

बिहीवार पार्टी कार्यालयमा आयोजित कार्यक्रममा ओलीले सरकारको सय दिनमा देशमा दुर्दशा निम्तिएको बताएका हुन् ।

‘दुनियाँका घर जलेका छन्, कसले जलायो ? त्यो क्षतिपूर्ति दिनुपर्छ कि पर्दैन ? केहीलाई आगो लगाउने छुट, मान्छे मार्ने छुट, लुट्ने छुट । केहीलाई निर्दोश भएपनि कारबाही हुनुपर्ने ?’ ओलीले भने, ‘यो फाँसीजमतर्फको यात्रा हो । फाँसीजमतर्फको तीव्र यात्राका सय दिन हुन् ।’

ओलीले भदौ २३–२४ मा युवाको हत्या षड्यन्त्रपूर्वक गरिएको दाबी गरे । ‘हामीले कुनै अपराध वा गल्ती गरेका छैनौं । नवयुवाको हत्या षड्यन्त्रपूर्ण ढंगले अरूले गराए । विभिन्न आयोग बने कसले गरायो, कसले गोली चलायो भन्न सक्ने अवस्था छैन,’ ओलीले भने, ‘आयोगले पत्ता लगाउन नसकेको हो कि बोल्न नसकेको, उहाँहरूले जान्ने कुरा । प्रतिवेदनमा कसले गोली चलायो कसरी गोली चलायो भन्न सक्ने अवस्था छैन ।’

मानव अधिकार आयोगले कानून बनाएर आफूहरूलाई कारबाही गर्न भनेकोप्रति ओलीले रोष प्रकट गरे ।

‘यत्रो जलेको छ, यत्रा घर जलेका छन्, यसको घर यसले जलायो भनेर भन्दैन छानबिनहरूले, कति निरीह छ ’ उनले भने, ‘केपी ओली लगायतलाई कारबाही गर्नुपर्छ । नयाँ कानून बनाएर कारबाही गर भन्छ मानव अधिकार आयोग, के दुर्दशा हो देशमा ?’