सत्तारुढ दलनिकट विद्यार्थी संगठन नेपाल विद्यार्थी संघ(नेविसंघ)ले त्रिचन्द्र क्याम्पसका ऐतिहासिक भवन पुनर्निर्माणका लागि ‘सेभ त्रिचन्द्र’ अभियान शुरू गरेको छ । अभियानका क्रममा शुक्रवार नेविसंघले त्रिचन्द्र अगाडि सडक प्रदर्शन गरेको छ । 

नेविसंघले मातृ पार्टी नेपाली कांग्रेसका सभापति एवं प्रधानमन्त्री शेरबहादुर देउवा लक्षित विभिन्न नारा तथा प्लेकार्ड प्रदर्शन गरेका छन् । उनीहरुले ‘प्रधानमन्त्री शेरबहादुर देउवा ज्यू तपाईंले पढेको कलेज कहिले बन्ने?’ भन्दै प्रश्न गरेका छन् । प्रदर्शनमा सहभागी विद्यार्थीहरुले ‘सेभ त्रिचन्द्र, सेभ घण्टाघर, नो इफ बट’, ‘भ्यू टावर बन्ने, त्रिचन्द्र नबन्ने, हामीलाई कक्षा कोठा देऊ,’ लगायतका नारा लेखिएका प्लेकार्ड बोकेका थिए । 

त्रिचन्द्र क्याम्पसका ऐतिहासिक भवन पुनर्निर्माणमा दबाब दिने उद्देश्यले ‘सेभ त्रिचन्द्र’ अभियान चलाएको नेविसंघले जनाएको छ । यसअघि नेविसंघले गत मंगलबार त्रिचन्द्र क्याम्पसका जीर्ण भवन र घण्टाघरमा सेभ त्रिचन्द्र लेखिएका ब्यानर टाँगेको थियो । 

२०७२ को भूकम्पमा त्रिचन्द्रको घण्टाघर तर्फको भवनमा क्षति पुगेको थियो । उक्त भवनमा अति जोखिमको संकेत स्वरुप ‘रातो स्टिकर’ लगाइएको थियो । शुरूमा राष्ट्रिय पुनर्निर्माण प्राधिकरणमार्फत् पुनर्निर्माण गर्ने भनिए पनि हालसम्म पुनर्निर्माणको काम थालिएको छैन । प्राधिकरणको म्याद सकिएपछि उक्त कामको जिम्मा शिक्षा मन्त्रालयलाई लगाइएको थियो । तर, शिक्षा मन्त्रालयले भवन पुनर्निर्माणको काममा चासो नदिएको भन्दै नेविसंघले आन्दोलन थालेको हो ।