भारतीय संसद्को तल्लो सदन लोकसभामा तृणमूल कांग्रेसकी एक नेत्रीले काँचो भन्टा टोकेकी छन् । 

बढ्दो महंगीका बारेमा चर्चा गर्ने क्रममा उनले भन्टा टोकेकी हुन् । 

कांग्रेस पार्टीका चार सांसदहरूलाई निलम्बन गरिएको अनि संसद्को कारवाही पटकपटक अवरोध भएको घटनापछि लोकसभामा मूल्यवृद्धिको बहस चलिरहेको छ । कांग्रेस सांसदहरूको निलम्बन पनि खारेज गरिएको छ । 

‘हामीले काँचै तरकारी खाऔं भन्ने सरकारको चाहना हो ?’ काकोली घोष दस्तीदारले संसदमा सोधिन् । खाना पकाउने ग्यास एकदमै महंगो भएको भन्ने सन्देश दिनका लागि उनले काँचो भन्टा टोकेकी हुन् । 

‘ग्यास सिलिन्डरको मूल्य केही महिनामा चार गुणा बढेको छ,’ उनले बताइन्, ‘६०० भारुमा पाइने सिलिन्डरलाई अहिले ११ सय भारु पर्न थालेको छ ।’

यसको मूल्य घटाउनुपर्ने उनको भनाइ छ ।