भारतको उत्तर प्रदेशको पिलिभितमा सम्बन्ध विच्छेदको एउटा घटना सार्वजनिक भएको छ । जसको कारण थाहा पाउँदा सबैजना अचम्मित भएका छन् । भारतीय सञ्चारमाध्यमहरूले जनाएअनुसार एक महिलालाई खानामा सेलाएको तरकारी दिएको निहुँमा उनका पतिले सम्बन्ध विच्छेद गरेका हुन् । 

सेलाएको तरकारी दिएपछि रिसले चूर भएका पतिले पत्नीलाई तीनपटक ‘तलाक तलाक तलाक’ भनेका थिए । मुस्लिम समुदायमा तीनपटक ‘तलाक’ भनेपछि सम्बन्ध विच्छेद हुने सामाजिक कानून छ । 

पतिले सम्बन्ध विच्छेद  गरेपछि उनी प्रहरीको शरणमा पुगेकी छन् । प्रहरीले सम्बन्ध विच्छेद गर्ने पतिविरुद्ध मुद्दा दर्ता गरेको छ । 

थाना पुरनपुर क्षेत्रको कस्बे घर भएकी ती युवतीले प्रहरीलाई दिएको बयानअनुसार उनीहरूको सन् २०२१ मे २३ तारिखमा विवाह भएको थियो । मुस्लिम परम्पराअनुसार रजागन्ज मोहल्लेका एक युवकका साथ उनको विवाह भएको थियो । कम दाइजो दिएको निहुँमा ससुराल पक्षले माइतीबाट बिदा दिइसकेका उनलाई घर लगेका थिएनन् । पछि उनका आमाले माग गरिएअनुसारको दाइजो दिएपछि मात्र उनलाई लगिएको थियो । 

विवाह मे २३ मा भए पनि उनलाई अगस्ट ८ मा मात्र घर भित्र्याइएको थियो । युवतीका अनुसार ससुराली पक्षले १५ लाख भारतीय रुपैयाँ दाइजोमा लिएका थिए । त्यसपछि पनि उनीहरू खुशी थिएनन् । सोही कारण उनलाई पतिले शारीरिक तथा मानसिक यातना दिने गरेका थिए । 

पछिल्लोपटक २०२२ अप्रिल १२ का दिन दिउँसोका खानामा सेलाएको तरकारी दिएको निहुँमा उनका पतिले सम्बन्ध विच्छेद गरेका हुन् । ‘तलाक’ दिनु अघि पतिले उनलाई नराम्रोसँग कुटपिटसमेत गरेको प्रहरीलाई दिएको बयानमा उल्लेख गरिएको छ ।