कञ्चनपुरको भीमदत्त नगरपालिका–९ ब्रह्मदेवमा रहेको सिद्धनाथ मन्दिरमा नवरात्रको अवधिमा २० हजारभन्दा बढी दर्शनार्थीले दर्शन गरेका छन् ।

नवरात्र, गंगा दशहरा, पूर्णागिरि मेलामा सिद्धनाथ मन्दिरमा श्रद्धालु भक्तजनको भीड लाग्दछ ।

नवरात्रमा दैनिक २ हजारको हाराहारीमा भारतीय तीर्थयात्रीले भगवान् सिद्धनाथको दर्शन गरेको मन्दिर व्यवस्थापन समितिका अध्यक्ष नारायणसिंह महताले बताए । सिद्धनाथ बाबाको दर्शनका लागि पुग्नेमा अधिकांश भारतीय दर्शनार्थी रहेका छन् ।

‘गएको २ वर्ष कोरोना महामारीका कारण मन्दिरमा दर्शनार्थी पुग्न सकेका थिएनन्,’ उनले भने, ‘कुनै आम्दानी भएन तर कोरोना संक्रमण घटेसँगै भारतीय दर्शनार्थी आउन थालेपछि मन्दिरको आम्दानी पहिलेझै हुन थालेको छ । यस वर्ष मन्दिरको आम्दानी ७० लाखदेखि ८० लाखसम्म पुग्ने अनुमान गरिएको छ ।’

‘कोरोनाको संक्रमण घटेसँगै मन्दिरको स्वामित्वमा रहेका ६५ वटा पसलको भाडा उठन थालेको छ,’ अध्यक्ष महताले भने, ‘प्रसादको ठेक्का मात्रै ५० लाख भन्दा बढी गएको छ, केही रकम मन्दिमा चढाइने भेटीबाट उठ्छ ।’

भारतीय व्यापारीहरूले सीमा क्षेत्र नजिकै बसेर प्रसाद बेच्न थालेपछि प्रसादको ठेक्का लगाउने कार्यमा केही असजिलो हुन थालेको उनको भनाइ थियो । 

संकलित रकममध्ये ५० प्रतिशत मन्दिरका भौतिक संरचना निर्माण, मर्मतसम्भार र कर्मचारीको तलबमा खर्च हुने गरेको छ । नगरपालिकासँग समन्वय गरी सडक लगायत पूर्वाधार विकासमा मन्दिर व्यवस्थापन समितिले रकम लगानी गर्दै आएको छ । सिद्धनाथ माध्यमिक विद्यालयका निजी स्रोतका शिक्षकको तलवका लागि केही रकम मन्दिरकै आम्दानीबाटै दिने गरिएको छ ।

मन्दिर परिसरमा धर्मशाला, सुलभ शौचालय, यज्ञशाला, मन्दिर लगायत संरचना निर्माण गरिएका छन् । निर्माण गरिएका संरचना मन्दिरकै आम्दानीबाट बनाइएका छन् ।