०७ असार २०८३, आइतबार
पर्वतको कुश्मा नगरपालिकाले सामुदायिक विद्यालयबाट एसईईमा ‘ए प्लस’ अंक ल्याएर उत्तीर्ण हुने विद्यार्थीलाई मासिक भत्ता दिने भएको छ ।
नगर सभाबाट पारित भएको कार्यक्रम नगरको चालू वर्षको नीति तथा कार्यक्रम र बजेट कार्यान्वयन भएसँगै लागू भएको हो । कुश्मा नगरपालिकाले विद्यार्थीको पढाइप्रतिको लगाव बढाउन तथा सामुदायिक विद्यालयमा पढ्न उत्प्रेरित र प्रोत्साहन गर्ने उद्देश्यले मासिक भत्ताको व्यवस्था गरेको नगर प्रमुख रामचन्द्र जोशीले जानकारी दिए ।
मासिक रूपमा विद्यार्थीहरूलाई २ हजार भत्ता दिन शुरू गरिएको जोशीले बताए । यसले विद्यार्थीलाई पढाइमा ऊर्जा मिल्नाका साथै विपन्न बालबालिकालाई थोरै भए पनि आर्थिक समस्या समेत टर्ने विश्वास रहेको उनले बताए ।
यस्तो भत्ता एसईई पास भएर १२ कक्षाको पढाइ नसकिने बेलासम्म दिइने नगरपालिकाले जनाएको छ । एसईईमा ‘ए’ प्लस ल्याएर ११ कक्षामा फेल भएमा भने भत्ता कटौती हुने गरी कार्यविधि बनाइएको छ । सामुदायिक विद्यालयका बालबालिकालाई भत्ता दिए पनि संस्थागत अर्थात् निजी बोर्डिङमा पढ्ने विद्यार्थीहरूलाई भने नदिइने नगर प्रमुख जोशीले बताए ।
