२९ असार २०८३, सोमबार
आधुनिक गीतका सु–प्रसिद्ध गायक स्वरुपराज आचार्यले फेरि पनि लोकदोहोरी गीतमा स्वर दिएका छन् ।
उनले यसअघि स्वर दिएको लोकदोहोरी गीत ‘डाँडाँघरे साइली’ निकै चर्चित भएको थियो ।
उक्त गीतले समाचार तयार पार्दासम्म युट्युबमा ४ करोड ६७ लाख बढी भ्युज पाइसकेको छ ।
‘डाँडाँघरे साइली’ गीतकै टिमले ल्याएको नयाँ गीत ‘निरमाया ठूली’मा स्वरुपराजले स्वर दिएका हुन् ।
‘डाँडाँघरे साइली’ बोलको गीत ब्लकबस्टर भएपछि सोही टिमले आचार्य र लक्ष्मी मल्लको स्वरमा गत शुक्रबार ‘निरमाया ठूली’ सार्वजनिक गरेको हो ।
कृष्ण केसीको शब्द तथा श्रीकृष्णबम मल्लको संगीत रहेको गीतलाई आशिष अविरलले एरेन्ज गरेका हुन् ।
मौसम हिमालीको कोरियोग्राफी एवं निर्देशन रहेको यो गीतको भिडियोमा प्रकाश सपुत, शिल्पा पोखरेल र करिश्मा ढकालको अभिनय हेर्न सकिन्छ ।
‘डाँडाघरे साइली’ गीतको भिडियोमा पनि प्रकाश, शिल्पा र करिश्माले अभिनय गरेका थिए ।
नवराज उप्रेतीको छायांकन रहेको भिडियोमा प्रविण भट्टको सम्पादन छ ।
आफ्नो मन युट्युब च्यानलबाट यो भिडियो सार्वजनिक गरिएको हो । मौलिकता बोकेको यस गीतले ‘डाँडाघरे साइली’ गीतले जस्तै माया पाउने विश्वास निर्माण टिमको छ ।
