विशाल प्रविधि कम्पनी गूगलले प्रत्येक वर्ष ‘ईयर इन सर्च’ प्रतिवेदन प्रकाशित गर्ने गर्छ । 

उक्त प्रतिवेदनमा गूगलमा सर्वाधिक खोजिएका शब्द, मानिस र घटनाक्रमहरूको विश्लेषण गरिन्छ । 

सर्वाधिक गूगल गरिएको शब्द वर्डल हो । यो एउटा ब्राउजर गेम हो जसमा शब्दको अनुमान गर्नुपर्ने हुन्छ । 

सन् २०२१ मा सफ्टवेयर इन्जिनीयर जोश वार्डलले यो गेम सार्वजनिक गरेका थिए । प्रयोगकर्ताहरूले दिनमा एक शब्द अनुमान गर्नुपर्ने हुन्छ र त्यसका लागि उनीहरूलाई ६ वटा मौका दिइन्छ । 

सबैजनाका लागि एउटै शब्द दिइएको हुन्छ र त्यस शब्दमा पाँचवटा मात्र अक्षर हुन्छन् । 

यो गेम ज्यादै लोकप्रिय भएपछि यसलाई खेल्नेहरूले गूगलमा सर्च गर्दा गूगलका अन्य सर्च ट्रेन्ड प्रभावित भएका हुन् । 

वर्डल लोकप्रिय भएपछि द न्युयोर्क टाइम्स पत्रिकाले यसलाई किनेको थियो । त्यसपछि पत्रिकाका ग्राहक पनि बढे । 

विश्वमा भएका प्रमुख घटना पनि गूगलमा व्यापक सर्च भएका छन् । बेलायतकी महारानी एलिजाबेथको मृत्युपछि सेप्टेम्बर महिनामा उनको नाम सर्वाधिक खोजिएको थियो । 

हरिउड अभिनेता जोनी डेपले आफ्नी पूर्वपत्नी एम्बर हर्डसँग अदालती मुद्दा लड्दै गर्दा उनलाई गूगलमा सर्वाधिक खोजिएको थियो । त्यस्तै अस्कर समारोहमा कमेडियन क्रिस रकलाई थप्पड हान्ने अभिनेता विल स्मिथ पनि सर्वाधिक खोजी गरिएका पात्र थिए ।