१२ साउन २०८३, मंगलबार
युगाण्डाका ६७ वर्षीय एक जना पिताले १०२ बच्चा जन्माएपछि आफ्ना श्रीमतीहरुलाई गर्भ निरोधक चक्की खान सुझाव दिएका छन् । उनीसँग अहिले १२ जना श्रीमती छन् ।
५६८ नातिनातिनाका हजुरबुवा बनेका मूसा हसाह्या नामका ती व्यक्तिले धेरै श्रीमती नराख्न अरुलाई सुझाव दिएका छन् । धेरै श्रीमती हुँदा विभिन्न समस्या आउने भन्दै उनले धेरै श्रीमती राख्नेहरुलाई बढीमा चार श्रीमतीसम्म राख्न सुझाएका छन् । उनले पहिलो पटक १६ वर्षको उमेरमा विवाह गरेको बताएका छन् ।
सन् १९७१ मा उनले पहिलो विवाह हनिफासँग गरेका थिए । दुई वर्षपछि उनको पहिलो सन्तानको रुपमा छोरीले जन्म लिएकी थिइन् । आफू जग्गा जमिन र श्रीसम्पत्तिले सम्पन्न भएकाले धेरैलाई पाल्न सक्ने भनेरै धेरै श्रीमती विवाह गरेको बताएका छन् । अन्तर्राष्ट्रिय सञ्चार माध्यमका अनुसार अहिले उनी आफ्नो श्रीमतीहरुलाई गर्भ निरोधक चक्की लिन सुझाव दिएका छन् । धेरै सन्तान भएकाले शिक्षा दिक्षाका लागि धेरै संघर्ष गर्नुपरेको उनले चिन्ता व्यक्त गरेका छन् ।
