बैंक अफ काठमाण्डु (बिओके) आजबाट ग्लोबल आइएमएई बैंकमा बिलय भएको छ । आजबाट दुई बैंक मर्ज भएर ग्लोबल आइएमई बैंकको रूपमा एकीकृत करोबार शुरु गरेको छ । मर्जर पश्चात् बैंकको कुल सम्पती ५ खर्ब ५ अर्ब, कूल पुँजी  ५७ अर्ब, चुक्ता पूँजी ३५ खर्ब ७७ अर्ब, कूल निक्षेप ४ खर्ब १२ अर्ब, कुल कर्जा ३ खर्ब  ७७ अर्ब पुगेको छ । यसको कुल ग्राहक संख्या ४० लाख पुगेको छ ।

मर्जरपछि बन्ने नयाँ बैंक कूल पुँजी, चुक्ता पुँजी तथा व्यवसायको आकारको हिसाबले नेपालको सबैभन्दा ठूलो बैंक बनेको ग्लोबल आइएमई बैंकका अध्यक्ष चन्द्र ढकालले बताए । नयाँ बैंकको सञ्चालक समितिमा ग्लोबल आइएमई बैकको तर्फबाट अध्यक्ष चन्द्रप्रसाद ढकालसहित ५ जना र बैंक अफ काठमाण्डौंको तर्फबाट २ जना रहेका छ्न । बैंकको प्रमुख कार्यकारी अधिकृतको रुपमा ग्लोबल आइएमई बैंकका प्रमुख कार्यकारी अधिकृत रत्नराज बज्राचार्य भएका छ्न् । 

२१ वटा बैंक तथा वित्तीय संस्थाहरु गाभिएर बन्ने ग्लोबल आइएमई लिमिटेडमा ५ वटा वाणिज्य बैंक, १० वटा विकास बैंक तथा ६ वटा फाइनान्स कम्पनी समाहित भएका छन् । दुई बैंकहरुको मर्जर पश्चात् कूल ३६५ शाखा कार्यालय, ३६७ एटिएम, २८६ शाखारहित बैंकिङ्ग सेवा, ६१ विस्तारित शाखा कार्यालयहरु, ३ वटा विदेशस्थित सम्पर्क कार्यालयहरुसहित अन्य धेरै वित्तीय परिसुचकहरुमा ग्लोबल आइएमई बैंक लिमिटेड मुलुकको सबैभन्दा ठूलो बैंक भएको पनि ढकलले बताए ।

यो बैंकको बजार हिस्सा नै करिब १० प्रतिशत पुगेको ढकालको भनाइ छ । खाडीमा रहेका नेपालीको रकम घर घर पुर्‍याएको र त्यसैको आशीर्वादले आज देशकै ठूलो बैंक बन्न सकेको पनि ढकालले बताए ।