नोकिया कम्पनीका प्रमुख कार्यकारी अधिकृत पेक्का लुन्डमार्कले सन् २०३० सम्म स्मार्टफोन नै आवश्यक नरहने बताएका छन् । 

कतिपय डिभाइसहरू मानव शरीरमा सिधै इम्प्लान्ट गरिने र इन्टरनेटसँग जोडिने उनको भनाइ छ । त्यस्तो अवस्थामा स्मार्टफोनहरू आवश्यकै पर्दैन । 

स्विटजरल्यान्डको डाभोसमा आयोजित वर्ल्ड इकोनोमिक फोरमको प्यानलमा बोल्दै उनले सन् २०३० सम्ममा ६जीको कमर्सियल उपयोग हुन थाल्नेछ र स्मार्टफोनहरू असान्दर्भिक बन्नेछन् भने । 

स्मार्टफोन सर्वसुलभ इन्टरफेस नहुने र कतिपय कुरा मानव शरीरमा सिधै फिट गरिने लुन्डमार्कको भनाइ छ । 

सन् २०३० सम्ममा कम्प्युटिङ पावर र नेटवर्क स्पीड निकै बढ्ने प्रक्षेपण गरिएको छ । अहिले उपलब्ध नेटवर्कभन्दा त्यो १०० देखि हजार गुणा फास्ट हुनेछ ।

मानव मस्तिष्कलाई सिधै इन्टरनेटसँग जोडिनेछ । मानिसहरूले साथीलाई फोन गर्न, बत्ती बाल्न, खाना अर्डर गर्न दिमागमा सोचे पुग्छ । 

मस्तिष्कसँगै एआई अल्गोरिमहरू पनि चल्नेछन् । यसले मानिसलाई नयाँ कला सिक्न, जीवन व्यवस्थित बनाउन र कठिन कार्य गर्न समेत सहायता गर्नेछ । क्लाउड कम्प्युटिङ कुनै पनि मानिसको दिमागको एक्सटेन्सन बन्नेछ ।