बाल यौन दुरुपयोगको मुद्दामा सजाय काटिरहेका अभिनेता पल शाह रिहा भएका छन् ।

उच्च अदालत पोखराले आइतवार सफाई दिएसँगै उनी सोमवार बिहान तनहुँ कारागारबाट रिहा भएका हुन् । न्यायाधीश डिल्लीराज आचार्य र श्रीधरा कुमारी पुडासैनीको इजलासले अभियोग दाबी नपुग्ने भन्दै उनलाई सफाइ दिएको हो । 

एक नाबालिगलाई बलात्कार गरेको आरोपमा पल शाहविरुद्ध जिल्ला अदालत नवलपरासी पूर्व र जिल्ला अदालत तनहुँमा मुद्दा चलेको थियो ।

जिल्ला अदालत नवलपरासी पूर्वले बाल यौन दुरुपयोगको आरोपमा साढे २ वर्ष कैद र पीडितलाई १० लाख क्षतिपूर्ति दिने फैसला गरेको थियो । उक्त फैसलाविरुद्ध पलले उच्च अदालतमा पुनरावेदन दिएका थिए । जिल्ला अदालत तनहुँले भने उनलाई सफाइ दिएको थियो ।

उनी एक वर्षदेखि तनहुँ कारागारमा थिए । पल शाह रिहाइ हुने भएपछि तनहुँ कारागार बाहिर बिहानैदेखि उनका समर्थकको भीड लागेको थियो । पललाई लिन उनका कानुन व्यवसायी, बहिनी रोशनी शाह र केही साथी कारागार भित्नै गएका थिए ।  उनीहरूले खादा, माला र अबिर लगाएर पलको स्वागत गरेका छन् ।

पललाई समर्थकले पनि फूलमाला र अबिरले स्वागत गरेका छन् । 

तस्वीरहरू : गोपीकृष्ण चापागाईँ

​

पल शाह