चर्चित लोकगायक बद्री पंगेनीले सार्वजनिक गरेको ‘पैसा सापटी’गीतलाई स्रोता दर्शकले निकै रुचाएका छन् ।

सामाजिक विषवस्तुमा तयार पारिएको गीतले युट्युबमा तीन दिनमै १० लाख बढी भ्युज पाएको छ । पंगेनीले पछिल्लो पुस्ताकी चर्चित गायिका रचना रिमालसँगको युगल स्वरमा सार्वजनिक गरेको गीत टिकटकमा पनि निकै हिट छ । 

स्रोता दर्शकहरुले आफ्नो जीवनसँग मेल खाने भन्दै उक्त गीतमा टिकटक भिडियो बनाएका छन् ।

गीतका अधिकांश टुक्काहरू टिकटकमा छाएका छन् ।

गायक पंगेनीले पैसा सापटी दिएपछि उत्पन्न हुने अवस्थामा रहेर गीत तयार पारेका हुन् । मानिसहरूले समस्या देखाएर पैसा सापटी माग्ने तर पैसा लगेपछि तिर्न नखोज्ने, बरु बोलचाल र भेटघाट नै कम गर्ने प्रवृत्तिलाई उनले गीतमा पेस गरेका छन् । पैसा सापटी दिएपछि सम्बन्ध बिग्रिएको कुरा गीतमा गरिएको छ ।

गायक पंगेनीकै शब्द एवं संगीत रचना रहेको गीतमा विश्वास नेपालले संगीत संयोजनको काम गरेका छन् । बद्री र रचनाले यसअघि ‘तिम्रो घरमा मेरी छोरी’ बोलको गीतमा सहकार्य गरेका थिए, जुन गीतलाई स्रोता दर्शकले रुचाएका थिए ।

गायक पंगेनीकै कथा एवं निर्देशनमा फिल्मी शैलीमा गीतको भिडियो तयार पारिएको छ ।

१७ मिनेट लामो भिडियोमा सागर लम्साल (बले), अनु रेग्मी, नन्दा बस्याल, सन्तोष पौडेल (बटुक) लगायतको अभिनय छ ।

राजेश घिमिरेको छायाँकन, मनोज कार्कीको सम्पादन रहेको भिडियो गायक पंगेनीको आफ्नै अफिसियल युट्युब च्यानलमा हेर्न सकिन्छ ।