३० जेठ २०८३, शनिबार
भारतको एयर इन्डियाका एक पाइलटले दुबईबाट दिल्ली आउँदै गर्दा ककपिटमा महिला मित्रलाई बोलाएको भनी कर्मचारीहरूले उजुरी दिएका छन् ।
गत फेब्रुअरी २७ मा क्याप्टेनले ती महिलालाई ककपिटमा बोलाएको मात्र नभई बिजनेस क्लासको खानेकुरा दिन समेत कर्मचारीलाई अह्राएका थिए ।
एयर इन्डियाले यस घटनाको अनुसन्धानका लागि एक समिति गठन गरेको छ । मार्च ३ मा कर्मचारीहरूले यस विषयमा उजुरी दिएका थिए ।
विमान कर्मचारीलाई शुक्रवार उड्डयन प्राधिकरणले बयान दिन बोलाएको छ ।
उजुरीका अनुसार, एआई ९१५ विमानमा चढ्नु अघिबाट नै समस्या आइसकेको थियो । कर्मचारीहरूले रिपोर्टिङ टाइमभन्दा बढी समयसम्म पाइलटलाई कुरेका थिए । पाइलटहरू नआएपछि कर्मचारी विमानमा प्रवेश गरेका थिए ।
पाइलटहरू पछि यात्रुुसँगै विमानमा प्रवेश गरे । त्युपछि पाइलटले आफ्नी एक महिला मित्रका लागि बिजनेस क्लासमा सीट खाली छ कि भनी सोधे । ती महिला यात्रुलाई इकोनोमी क्लासबाट बिजनेस क्लासमा स्तरोन्नति गराउने पाइलटको उद्देश्य थियो ।
त्यसपछि पाइलटले महिला मित्रलाई ककपिटमा बोलाएका थिए अनि उनको आरामका लागि सिरानी ल्याउन कर्मचारीलाई अह्राएका थिए । ती महिला फर्स्ट अब्जर्भरको सीटमा बसेकी थिइन् ।
महिलाले ककपिटमा एक घन्टा बिताएकी थिइन् ।
उनी त्यहाँ बसुन्जेल कर्मचारीहरूलाई बारम्बार बोलाइएको थियो । महिलालाई बिजनेस क्लासको खाना र नास्ता उपलब्ध गराइएको थियो । त्यसले गर्दा विमान कर्मचारीहरूले अन्य यात्रुलाई सेवासुविधा दिन पाएका थिएनन् ।
महिला ककपिटभित्र हुँदा पाइलटहरू आफ्नो स्वाभावित अवस्थामा नरही पल्टिरहेको पाइएको गुनासो पनि कर्मचारीहरूले गरेका छन् ।
