बागलुङको नेपाल माध्यमिक विद्यालयलाई दक्षिण कोरियाली सरकारले सहयोग गर्ने भएको छ ।

विद्यालयको स्तर उन्नतीका लागि नेपाल सरकार र दक्षिण कोरियाली प्रतिनिधि मण्डलबीच शिक्षा तथा विज्ञान प्रविधि मन्त्रालयमा एक सम्झौता भएको छ ।

गण्डकी प्रदेशअन्तर्गत बाग्लुङको ताराखोला गाउँपालिकामा वडा नम्बर ४ मा रहेको विद्यालयमा विज्ञान प्रविधिसम्बन्धी आईसीटी परियोजना सञ्चालन गर्नको लागि उक्त सम्झौता गरिएको हो ।

सम्झौतासँगै अब विद्यालयमा  अत्याधुनिक प्रविधि तथा हार्डवेयर प्रयोग गरी नमुना विद्यालय बनाइने छ ।

जसका लागि कोरियन समूहका प्रमुख, व्यवस्थापन, इन्जिनियरसहितको ५ जना र सम्बद्ध नेपालबाट ३ जनाको टोलीले नेपाल माध्यमिक विद्यालयमा २ पटक अनुगमन गरिसकेका छन् ।

विद्यालय व्यवस्थापन समितिका अध्यक्ष दिवस खत्रीका अनुसार पहिलोपटक २०७९ साल मंसिरमा स्थलगत अनुगमन गरेको कोरियन टोलीले दोस्रोपटक २०८० साउनमा अनुगमन गरेको थियो ।

‘हामी बहुआयामिक ढंगले विद्यालयलाई नेपालकै नमुना शिक्षालय बनाउन चाहान्छौं, त्यसका लागि हामी आफैंले मात्रै केही गर्न सक्दैनौं,’ उनले भने, ‘विदेशको आधुनिक प्रविधि भित्र्याउनु हाम्रो चाहना मात्र नभई बाध्यता पनि हो । हामी अन्तर्राष्ट्रिय स्तरको प्रविधिमा अगाडि बढ्न चाहन्छौं ।’

संस्थानका प्रमुख आछुछीनाका अनुसार आगामी  कात्तिक/मंसिरमा परियोजनाको दोस्रो चरणको काम शुरू हुनेछ ।

यो वर्ष कक्षा कोठा व्यवस्थापन गरी  सम्पूर्ण प्रविधि सामग्री ल्याउने र जडान गरिनेछ । साथै अर्को वर्ष तालिमको व्यवस्था  गर्ने, त्यसको दुई वर्षमा विद्यालयमा मूल्याङ्कन गरिने बताइएको छ ।

यस परियोजनाले कोरिया र नेपालका शिक्षक शिक्षिकाहरूको बीचमा सञ्चार समन्वय आदान–प्रदानमा सहयोग पुग्ने विश्वास लिइएको छ ।