०३ असार २०८३, बुधबार
चर्चित सिरियल ‘भुन्टी’का पछिल्ला एपिसोडमा शीर्ष कलाकार आशा खड्का गर्भवती भूमिकामा देखिँदै आएकी छन् । सिरियलकी यी चर्चित कलाकारले सामाजिक सञ्जालमा पनि गर्भावस्थाको तस्वीर र भिडियो राख्दै आएकी छन् ।
यथार्थमा भने ‘भुन्टी’सहित ‘कान्छी’ सिरियलकी निर्माता एवं निर्देशक समेत रहेकी आशा एक महिनाअगाडि नै आमा बनिसकेकी छन् । उनलाई पुत्रीलाभ भएको छ ।
आशाले तीन वर्षअघि सागर गौतमसँग विवाह गरेकी थिइन् । आशाका श्रीमान पनि ‘कान्छी’ सिरियलमा नियमित देखिँदै आएका छन् ।
आमाबुवा बने पनि यो जोडीले बच्चाको तस्वीर सार्वजनिक गरेका छैनन्, न त आमाबुवा बनेको जानकारी नै दिएका छन् ।
सिरियल ‘भुन्टी’मा गर्भावस्थाको कथा अगाडि बढिरहेकाले यो जोडीले सन्तानलाई जन्म दिएको खबर सार्वजनिक नगरेको निकट स्रोतले बतायो ।
‘आमा बनेको तस्वीर राख्दा दर्शकलाई सिरियलको कथा पुरानो लाग्न सक्छ । दर्शकलाई पुरानो कथा आएको महसुस हुन नदिन भनेर नै आमा बनेको खबर सार्वजनिक नगर्नुभएको हो,’ स्रोतले भन्यो ।
व्यक्तिगत जीवनका खुशीहरूसमेत लामो समयसम्म सार्वजनिक नगर्नुले उनीहरू कलाकारिताप्रति कतिसम्म समर्पित छन् भन्ने देखाउने एक कलाकारले बताए ।
छोरीलाई सिरियलमै ल्याउने तयारी
आशाले छोरीलाई जन्म दिनुअघि दुवै सिरियलको केही स्टक एपिसोड खिचिसकेकी छन् ।
‘भुन्टी’ सिरियल वैशाखसम्मका लागि स्टक खिचिएको छ । स्रोतका अनुसार ‘भुन्टी’को कथा अगाडि बढ्दै जाँदा आशाले छोरीलाई सिरियलमै देखाउने सोच बनाएकी छन् ।
‘वैशाखमा खिचिने एपिसोडमा छोरी ल्याउने उहाँहरूको तयारी छ । त्यतिबेला बल्ल आमा बनेको खबर सार्वजनिक गर्ने सोच्नुभएको छ,’ आशानिकट रहेका एक कलाकारले भने ।
अहिलेको समयमा नेपालमा सबैभन्दा धेरै भ्युज पाउने सिरियलमा ‘भुन्टी’ र ‘कान्छी’ पर्छन् ।
सामाजिक कथामा निर्माण हुँदै आएको सिरियलका कारण शहरदेखि ग्रामीण भेगका दर्शकसम्म आशा निकै लोकप्रिय छिन् ।
सिरियलमै काम गर्ने क्रममा आशा र सागर नजिक भएका थिए, जतिबेला सागर सिरियलको छायाँकार थिए ।
केही समयको प्रेमपछि लगनगाँठो कसेका उनीहरूले विवाहको खबर पनि दुई वर्षपछि गत वर्ष मात्रै सार्वजनिक गरेका थिए ।
