२९ जेठ २०८३, शुक्रबार
लोक दोहोरी गीतको प्रवर्द्धन गर्ने उद्देश्यसहित आजदेखि बुटवलमा लुम्बिनी प्रदेश स्तरीय दोहोरी खेल प्रतियोगिता हुँदैछ । लोक दोहोरी गीत प्रतिष्ठान लुम्बिनी प्रदेशको आयोजनामा हुने दुई दिने प्रतियोगितामा प्रदेशका १० जिल्लाबाट प्रतियोगी टिम बुटवल आउँदैछन् ।
प्रतिष्ठानका अध्यक्ष दिपु मगरले रुकुम पूर्व र अर्घाखाँचीबाहेक दश जिल्लाबाट टिम प्रतियोगितामा सहभागी हुने जानकारी दिए । हरेक जिल्लाबाट तीन जना पुरुष र तीन जना महिला सहितको टिम हुनेछन् ।
प्रतियोगितामा प्रथम हुने टिमले ५५ हजार ५५५, द्वितीयले ३३ हजार ३३३, तृतीयले २१ हजार १११ र सान्त्वनाले १५ हजार शिल्ड, मेडल र प्रमाणपत्र प्राप्त गर्नेछन् ।
प्रतिष्ठानका सचिव योगराज पोखरेलले कार्यक्रममा ७०० कलाकारको सहभागिता रहने बताए । लुम्बिनी प्रदेश खेलकुद परिषद्का सदस्यसचिव जयप्रकाश भट्टराईले दोहोरी खेल दिमाग खिवाउने खेल भएकोले खेलकुदको विधामा पनि पर्ने बताए ।
प्रतियोगितामा निर्णायक संमितिको संयोजकको जिम्मेवारीमा प्रतिष्ठानका केन्द्रीय सल्लाहकार खेमबहादुर हमाल रहेका छन् ।
