२७ असार २०८३, शनिबार
अगामी भदौ ११ देखि १६ गतेसम्म हुने ‘नाडा अटो शो २०२४’ को तयारी तीव्ररूपमा भइरहेको छ । व्यवसायीहरू पनि अटो शोको तयारीमा व्यस्त छन् । गत वर्ष ईभीमय बनेको अटो शो यस वर्ष पनि ईभीमय नै बन्ने देखिन्छ ।
नाडा अटोमोबाइल्स एसोसिएसन अफ नेपालले गत जेठ ३१ गतेदेखि नै सहभागी हुने कम्पनी तथा ब्रान्डहरूका लागि स्टल बूकिङ खुला गरेको थियो ।
१६ औं संस्करणको ‘नाडा अटो शो– २०२४’लाई लिएर व्यवसायीहरू उत्साहित छन् ।
हरेक वर्ष हुने देशकै सबैभन्दा ठूलो अटो शोमा नयाँ ब्रान्डका गाडी लन्चिङदेखि प्रदर्शनसम्म हुने गर्छ । गत वर्ष करिब ७६ हजारले अटो शो अवलोकन गरेका थिए ।
यस वर्षको लक्ष्य पनि अलिक बढी नै हुने देखिन्छ ।
ईभीप्रति ग्राहकको रुचि बढेकाले यस वर्षको अटो शोमा ६० प्रतिशतभन्दा बढी ईभी गाडीहरू देखिने नाडा अटोमोबाइल्स एसोसिएसन अफ नेपालका अध्यक्ष करण चौधरीले बताए ।
उनका अनुसार कोभिडको समयमा स्थगित गरिएको देशकै ठूलो अटो शोप्रति ग्राहकको उत्साहमा कमी आएको छैन, बरु थपिएको छ ।
नाडा अटो शो २०२४ को तयारी तीव्र रूपमा भइरहेको नाडा अटोमोबाइल्स एसोसिएसन अफ नेपालका महासचिव सुरेन्द्र उप्रेती बताए ।
छिट्टै पत्रकार सम्मेलनमार्फत नाडा अटो शो– २०२४ घोषणा गरिने उनको भनाइ छ ।
सरकारी नीतिका कारण अटोमोबाइल क्षेत्रमा समस्या
अटो शोलाई लिएर व्यवसायीहरू आशावादी रहे पनि देशको अटोमोबाइल क्षेत्र निकै नाजुक अवस्थाबाट गुज्रिरहेको छ । व्यवसायी पलायन हुने अवस्थामा पुग्न लागेको नाडा अटोमोबाइल्स एसोसिएसन अफ नेपालका अध्यक्ष करण चौधरी बताउँछन् ।
अध्यक्ष चौधरीले भने, ‘समग्र अटोमोबाइल क्षेत्र अहिले निकै नाजुक अवस्थाबाट गुज्रिरहेको छ । देशको जीडीपीमा २१ प्रतिशतसम्म योगदान दिने अटोमोबाइल क्षेत्रमा अहिले ६८ प्रतिशतसम्मले गिरावट आएको छ । अटोमोबाइल क्षेत्रमैत्री नीतिको कमीले थुप्रै व्यवसायीहरू पलायन हुने अवस्थामा पुगिसकेका छन् ।
स्थिति यति भयावह छ कि आफ्नो व्यवसाय बन्द गरी विदेश जानुपर्ने स्थितिसम्म आएको गुनासो व्यवसायीहरूको छ । व्यापार बन्द हुनु भनेको देशको रोजगारीमा समस्या आउनु हो । व्यवसायीलाई टिकाउन ईभीमा लागू गरिएको सहुलियत नीतिलाई निरन्तरता दिनुपर्ने व्यवसायीहरूको भनाइ छ ।
‘अब दिनमा हामीले पर्याप्त विद्युतीय पूर्वाधार निर्माणमा ध्यान दिनुपर्छ । तर, पेट्रोलियम गाडीहरूलाई नकारात्मक रूपमा हेर्नु हुँदैन । आज धेरै नेपालीहरूको रोजगारी यसमा निर्भर छ । पेट्रोलियम गाडी र ईभीलाई ‘लेभल प्लेयिङ फिल्ड’ मा राख्नुपर्छ, अर्थात् भन्सार घटाउनुको साटो खरिदमा सहजता गर्नुपर्यो । यसका साथै ५० प्रतिशत डाउन पेमेन्ट अनिवार्य गर्नेजस्तो नीति र नियममा सुधार हुन आवश्यक छ । यसले अटो मोबाइल क्षेत्रमा गिरावट आइरहेको छ,’ उनले भने ।
महासचिव उप्रेतीले पनि सरकारले अटो मोबाइल क्षेत्रलाई बेवास्ता गरिरहेको गुनासो गरे ।
‘सरकारले अटो मोबाइल क्षेत्रलाई सहयोग नै गरेको छैन भन्दा फरक पर्दैन । चाहे त्यो विगतका वर्षमा होस्, या अहिले । सधैं यो क्षेत्र मारमा पर्दै आइरहेको छ । देश विकासको मेरुदण्ड ट्रान्सपोटेसन हो । यसलाई कुन सरकारले बुझ्छ थाहा छैन । यसका साथै सरकार यस क्षेत्रलाई जोगाउनुपर्छ भन्ने पक्षमा पनि छैन जस्तो लाग्छ । कर मात्रै लिएर देश बन्दैन । यस क्षेत्रलाई सधैं यसरी नै नर्हेने हो भने, भोलिको दिनमा एउटा मात्रै व्यवसायी विस्थापित हुँदा कयौं रोजगारी गुम्छन्, त्यसबारे सोच्नुपर्छ,’ महासचिव सुरेन्द्र उप्रेतीले भने ।
यस्तो छ अटो शो को विगत
सन् १९९८ मा नेपाल अटोमोबाइल डिलर्स एसोसिएसन र ग्लोबल एक्सपोजिसन एन्ड म्यानेजमेन्ट सर्भिसेसको संयुक्त आयोजनामा पहिलोपटक नाडा अटो शो भएको थियो । त्यस्तै, सन् २००० को नोभेम्बरमा दोस्रो अटो शो सम्पन्न भयो ।
सन् २००४ मा तेस्रो, सन् २००७ सेप्टेम्बरमा चौथो, सन् २००९ को अगस्टमा पाँचौं र सन् २०११ को सेप्टेम्बरमा छैटौं अटो शो सम्पन्न भएको थियो ।
त्यति बेलासम्म दुई/तीन वर्षको अन्तरमा गरिँदै आएको अटो शो सन् २०११ बाट प्रत्येक वर्ष गर्ने निर्णय नाडा अटोमोबाइल डिलर्स एसोसिएसनले गरेको थियो । र, सन् २०१२ को सेप्टेम्बरमा सातौं अटो– शो सम्पन्न गरियो ।
त्यसैगरी, सन् २०१३ मा आठौं, सन् २०१४ मा नवौं, सन् २०१५ को सेप्टेम्बरमा १० औं, सन् २०१६ मा ११ औं, सन् २०१७ मा १२ औं, सन् २०१८ को सेप्टेम्बरमा १३ औं र सन् २०१९ मा १५ औं अटो शो सम्पन्न भएको थियो ।
त्यसलगत्तै कोभिड– १९ को लहरका कारण चार वर्षसम्म अटो शो हुन सकेन । र, गत वर्ष सन् २०२३ मा १५ औं संस्करणको नाडा अटो शो सम्पन्न भएको थियो । १६ औं संस्करणको अटो शो आगामी भदौमा गर्ने तयारी छ ।
