काठमाडौंको तारकेश्वर नगरपालिका-५ अर्यालटारमा खेलमैदान भासिएको छ । खोला पुरेर बनाइएको मैदानको बीच भाग भासिएको स्थानीय कुलप्रसाद अर्यालले जानकारी दिए । 

उनका अनुसार रुद्रेश्वर खोला पुरेर मैदान बनाएको थियो । महिना दिनअगाडि ढल फुटेर मैदान भासिएको उनले बताए । 

यसअघि बुधबार मात्रै ललितपुरको महालक्ष्मी नगरपालिका- ३ बोझे पोखरी हुँदै इमाडोलतर्फ जाने भित्री सडकमा भ्वाङ परेको थियो । 

गत साता काठमाडौं महानगरपालिकाको कार्यालय नजिकैको सडकमा पनि भ्वाङ परेको थियो । महानगरको कार्यालय रहेको काठमाडौं प्लाजादेखि उत्तरतर्फको सडक भासिएको थियो ।